Քաղաքացուն տուգանենք, որ աշխատավարձ ու թոշակ տանք

Ազգային ժողովի «Իմ քայլը» խմբակցությունը որոշել է կրկին փոփոխություններ կատարել «Վարչական իրավախախտումների մասին», «ՀՀ վարչական դատավարության օրենսգրքում լրացում կատարելու մասին» օրենքներում և արտակարգ դրության ընթացքում հանրային բաց տարածքներում դիմակ կրելու պահանջները խախտելու համար սահմանել 20 հազար դրամ տուգանք, իսկ փակ տարածքներում, տրանսպորտային միջոցներում, աշխատավայրում դիմակ կրելու պահանջները խախտելու համար քաղաքացիներին տուգանել 50 հազար դրամով:

Կորոնավիրուսի վարակի դեմ պայքարելու համար քաղաքացուն տուգանքի մատերիալ դարձրած այս իշխանությունը խելագարության ժանրին բնորոշ օրենսդրական նախաձեռնություններով արդեն առաջացնում է քաղաքացու ոչ թե զայրույթը, այլ քմծիծաղն ու ոչ ավելին:

Իշխանությանն արդեն լուրջ չընդունող ՀՀ հպարտ քաղաքացին շատ լավ է հիշում, թե ինչպես էր երկու ամիս առաջ նույն իշխանությունը հայտարարում, որ քաղաքացիներին պետք է տուգանել 100 հազար դրամով: Հետո հպարտ քաղաքացին ականատես եղավ, թե ինչպես է իշխանությունը իր բերած նախագծում առաջարկում փոփոխություն անել ու 100 հազար դրամը դաձնել 10 հազար դրամ: Հիմա քաղաքացին տեսնում է, որ նույն իշխանությունը իր ձեռքով 10 հազար դրամը հասնցում է 50 հազար դրամի:

Մի կողմ թողնենք այն, որ իշխանության այս անվճռականությունն ու իրար հակասող քայլերը զրոյին են հավասարեցնում նրա առանց այն էլ չեղած վարկանիշը: Ինքն իր վարկանիշի հետ թող հարցերը լուծի, բայց ինչ հարված է սա հասցնում տնտեսությանը, արդյոք այս մասին մտածե՞լ են նման փոփոխություններ երկնողները:

Արդյոք քայլարծները մտածե՞լ են, թե ինչ հարված են հասցնում ռեստորաններին ու սրճարաններին, որ ամեն վայրկյան 50 հազար դրամ տուգանքվելու ահից որևէ մեկը չի գնա սրճարան ու ռեստորան ու դա կբերի այս ոլորտի սնանկացման:

Առանց այն էլ արդեն փակվել են բազմաթիվ հանրային սննդի կետեր, նրանց հերթական հարվածը հասցրեց Առողջապահության նախարարությունը և կոչ արեց քաղաքացինեին սրճարան չգնալ, հիմա վերջական ջախջախիչ հարվածը հասցնում է Իմ քայլը՚: Իսկ որն է սրա իականա պատճառը՝ պայքարելը կորոնավիրուսի դեմ, թե պետական դատարկված գանձնարանը լցնելը: Հաշվի առնելով կորոնավիրուսի հասցրած տնտեսական հետևանքները ու մեր իշխանավորների դրա տակից դուրս գալու կարողությունների բացակայությունը, ակնհայտ է դառնում, որ քաղաքացին տուգանվում է, որ թոշակ տալու և աշխատավարձ վճարելու փող լինի:

NewsPress.am