Մի շարք քաղաքացիներ դիմել են «Տաշիր» Սամոյին

Newspress.am-ն ահազանգ է ստացել  մի շարք քաղաքացիներից: Վերջիններս բնակարանային խնդիրը լուծելու ակնկալիքով դիմել են կառավարությանն ու պատկան մարմիններին և  մերժում ստացել: Այժմ նրանք իրենց խնդրով դիմել են Տաշիր խմբի սեփականատեր պարոն Ս. Կարապետյանին: Ստորև ներկայացնում ենք դիմումն ամբողջությամբ:

Դ Ի Մ ՈՒ Մ

Մեծարգո պարոն Կարապետյան.
Նախապես հայցելով Ձեր ներողամտությունը՝ մենք՝ ՀՀ մի քանի քաղաքացիներ, այդ թվում և ներքոստորագրողներս, դիմում ենք Ձեզ՝ ապավինելով Ձեր վեհանձն մարդասիրությանը, Ձեր պատրաստակամությանը՝ օգնության ձեռք մեկնել խեղճերին, անօրինականություններից ու վայրագ կամայականություններից տուժածներին, ամեն տրամաչափի պաշտոնյաների անարդարության ու հանցավոր անտարբերության զոհերին։ Փորձենք հակիրճ ներկայացնել մեր թշվառ վիճակը։
Մոտ ութ տարի առաջ մեր ընտանիքների բնակարանային խնդիրները լուծելու համար դիմեցինք «Նորաշեն» ԱԿ-ին, մուծեցինք պահանջված գումարները, որ վաստակել էինք տարիների ընթացքում, և հույսով սպասում էինք, որ վերջապես կապրենք սեփական հարկի տակ։ Պարզվեց, սակայն, որ ընկելենք խաբեբաների ու խարդախների թակարդը. Նշված շինարարական կազմակերպության անօրինական գործողությունների հետևանքով մեր վճարած փողը փոշիացավ։
Նույն նպատակով մենք դիմեցինք ք.Երևան Բաբաջանյան 25/3 հասցեում կառուցվող բազմաբնակարան շենքի սեփականատեր Սարգիս Աղաբեկյանին, որը համաձայնվեց վերոնշյալ հասցեում կառուցվող բազմաբնակարան շենքից բնակարաններ տրամադրել «Նորաշեն» ԱԿ- ից տուժած թվով տասնութ քաղաքացիների (1 քմ 350 ԱՄՆ դոլարին համարժեք դրամով, ինքնարժեքը՝420 դոլար)։ Սակայն ներկայումս ՀՀ բանկերի կողմից շինարարության ոլորտը չֆինանսավորելու հետևանքով նշված շենքի կառուցումը ձգձգվում է:

Ելնելով այս անհույս վիճակից և ակնկալելով պետության բարձրագույն իշխանության՝ կառավարության գործուն միջամտությունը՝ դիմեցինք ՀՀ վարչապետին՝ նշված շենքի աշխատանքները սկսելու համար անհրաժեշտ վարկային ռեսուրսների ներգրավմանը օժանդակելու խնդրանքով, սակայն մեզ ընդունեց վարչապետի աշխատակազմի ղեկավար պարոն Ղազարյանը, որը մեր կողմից բարձրացրած խնդիրներին լուծում տալու փոխարեն, մեզ առաջարկեց դիմել ՀՀ դատարաններին, կարծես թե դատարանները շենքի ֆինանսավորման համար վարկային կառույցներ են, մենք էլ դրանց գոյության մասին ՀՀ կառավարությունից պետք է իմանայինք:

Մեծարգո պարոն, ասենք նաև, որ մեզ հույս տվող Ս. Աղաբեկյանը այժմ էլ պատրաստակամ է հնարավոր ֆինանսավորման առկայության դեպքում սպասարկել ներգրավված վարկային միջոցները կամ. կառուցվող շենքից ֆինանսավորող կողմին տալ բնակարաններ`շուկայականից էժան գնով:

Պարոն Ս. Կարապետյան, մենք այլ ճար չունենք և ստիպված դիմում ենք Ձեզ ու Երևանի Բաբաջանյան 25/3 բազմաբնակարանային շենքի ֆինանսավորման հետ կապված, նաև հաշվի առնելով ֆինանսավորող կողմին վերոհիշյալ փոխհատուցում տրամադրելու պայմանը՝ խնդրում ենք Ձեր օժանդակությունը:

Ընդունեցեք, խնդրում ենք, մեր հարգանքների անկեղծ հավաստիքը։

Դիմողներ`
1. Սպերցյան Ասքանազ
2. Սպերցյան Կարապետ
3. Սպերցյան Արարատ
4. Վանեսյան Արտակ
5. Եղիկյան Արաքսյա
6. Սանոսյան Լիզա
7. Արշակյան Մյասնիկ
8. Սահակյան Սահակ
9. Գալստյան Նորիկ
10. Մուրադյան Մաքսիմ
11. Գրիգորյան Կամո
12. Գրիգորյան Միշա
13. Հայրապետյան Օֆելյա
14. Վասիլյան Գալյա
15. Զոհրաբյան Ժենյա
16. Մկրտչյան Սեդա
17. Անտոնյան Սառա
18. Հարությունյան Նառա