Ծնելիության ցուցանիշի անկումն ահագնացող է. փոխնախարար

2017 թ. ՄԱԿ-ի բնակչության հիմնադրամի պատվերով կատարած մի ուսումնասիրության արդյունքում վեր են հանվել անձանց վերարտադրողական վարքագծի վրա ազդող այն հիմնական գործոնները, որոնք շահառուների տեսակետից ունեին պետական միջամտության կարիք։ Այս մասին լրագրողների հետ զրույցում ասաց սոցիալական հարցերի նախարարի տեղակալ Սմբատ Սաիյանը։

Նրա փոխանցմամբ, որպես այդպիսին առաջին հորիզոնականը զբաղեցնում է մարդկանց զբացվածության խնդիրը՝ աշխատանքը և ապագայի նկատմամբ հավատի բացակայությունը: Երկրորդ տեղերում՝ բնակարանային ապահովության հետ կապված խնդիրն է, իսկ երրորդ տեղում սոցիալական անպաշտպանվածության հարցը. մարդիկ իրենց սոցիալապես նապաշտպան են զգում:

Այս համատեքստում էլ կառավարությունը, ըստ փոխնախարարի, մշակել է ծրագրեր, որոնք կմեղմեն վերոհիշյալ խնդիրները:

Որպես այդպիսին, Սմբատ Սաիյանը մատնանշեց հուլիսի 1-ից բարձրացող երեխայի ծննդյան միանվագ նպաստի չափը՝ առաջին և երկրորդ երեխաների ծննդյան դեպքում:

«Այսօր այդ գումարը կազմում է 50 հազար և 150 հազար դրամ, որոնց փոխարեն, առաջին և երկրորդ երեխաների դեպքում կլինի 300 հազար դրամ»,-ասաց փոխնախարարը՝ հավելելով, որ հուլիսի 1-ից մեկնարկելու են նաև բնակարանային ապահովության աջակցության ծրագրեր։

Փոխնախարարի խոսքով, ըստ վիճակագրության, ամենախոցելի վայրերը, ծնելիության առումով, եղել են գյուղերը:

«Օրինակ, 1000 անձի հաշվով ծնունդների քանակով, եթե 1992 թվականին այդ ցուցանիշը քաղաքում կազմել է 18,1, գյուղական բնակավայրերում՝ 23,8, ապա 2018 թվականին այդ ցուցանիշը քաղաքում կազմում է 12,8, գյուղում՝ 11,5, այսինքն գյուղական բնակավայրում ցուցանիշի անկումը շատ ավելի ահագնացող է»,-ասաց փոխնախարարը: Նա նշեց նաև, որ եթե 1990 թվականին գյուղում ծնելիության գումարային գործակիցը կազմել է 3,2, ապա այսօր այն իջել է1,5, իսկ քաղաքում կրկնակի ավելի անկում է ապրել: