Գույքահարկի բարձրացումը պիկի ժամանակ քաղաքացու դեմ ուղղված աննախադեպ քայլերից էր. Նաիրա Զոհրաբյան

ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը վստահ է՝ գույքահարկի բարձրացումը եծապես վնասելու է մեր հայրենակիցներին: Նա լրագրողների հետ զրույցում նշեց, որ «Գույքահարկի բարձրացման մասին» օրենքը բավականաչափ վտանգավոր և հատկապես սոցիալական լարվածության այս պիկի ժամանակ քաղաքացու դեմ ուղղված աննախադեպ քայլերից էր:

«Ես ճանաչում եմ բազմաթիվ անձանց, որոնք բնակարան ունեն Կենտրոնում, սակայն այժմ ապրում են թոշակով, և իրենց համար խնդիր է առաջանալու»,-ասաց Նաիրա Զոհրաբյանը:

Անդրադառնալով «Իմ քայլը»-ից Հովիկ Աղազարյանի այն հայտարարությանը, թե քաղաքի կենտրոնում բնակվողները կարող են վաճառել իրենց բնակարանները և այլ հատվածում ապրել, Նաիրա Զոհրաբյանը նկատեց. «Ես սա համարում եմ ցինիկ վերաբերմունք բավականաչափ լուրջ վաստակ ունեցող մտավորականների հանդեպ, որոնք իրենց տները ժառանգել են իրենց ծնողներից և հիմա, չունենալով աշխատանք, ստիպված են լինելու բավականաչափ գումարներ վճարել»-ասաց նա:

ԲՀԿ-ն շարունակելու է բարձրաձայնել բոլոր այն խնդիրները, որոնք համարում է մտահոգիչ՝ անկախ նրանից, թե իրենց դեմ ինչպիսի քաղաքական հաշվեհարդարներ կլինեն:

«Ամենաանբարո բանը, որ արեց այս իշխանությունը և շարունակում է անել, կարմիր գիծը հատելն էր: Քաղաքականության մեջ չգրված օրենք կա՝ փոքր երկիր է, քաղաք է, մենք էլ շատերի մասին շատ բան գիտենք, բայց ես նողկալի եմ համարում այդ ամենը հրապարակելը, մարդու անձնական կյանք մտնելը: Որևէ իշխանություն իրեն թույլ չտվեց մտնել իր ամենաարմատական հակառակորդի անձնական կյանք, ինչ արեց այս իշխանությունը: Սա բարոյական կարմիր գիծն էր, որ անցան, բայց սրա պատասխանը տալու են շատ ու շատ դաժան»,-ասաց պատգամավորը: