Կամուրջը նորոգելու փոխարեն, Դարբինյանն առաջարկում է աշակերտներին փոխել դպրոցը (տեսանյութ)

Վանաձորի քաղաքապետ Սամվել Դարբինյանը քաղաքի երկու մեծ թաղամաս իրար կապող կամուրջի վերանորոգումը նպատակահարմար չի գտնում:

Ավելի վաղ newspress.am-ը հայտնել էր, որ գարնանային վարարումների հետևանքով Տանձուտ գետի մակարդակը կտրուկ բարձրացել էր և փլուզել հետիոտնային կամուրջը:

Քանի որ կամրջով անցնում են Սանկտ Պետերբուրգ տնակային ավանի ու Լագեր թաղամասում բնակվող Խ. Աբովյանի անվան թիվ 9 դպրոց հաճախող աշակերտների 90 %-ը, ուստի կրթօջախի տնօրեն Անահիտ Վարդանյանը խնդրի լուծման համար բազմիցս դիմել է պատկան մարմիններին: Մասնավորապես դիմում է գրել քաղաքապետին և ստացել պատասխան, ըստ որի` համայնքը կամրջի նորոգման համար միջոցներ չունի:

newspress.am-ի հետ զրույցում Սամվել Դարբինյանը նշեց, որ ինքն այստեղ խնդիր չի տեսնում, իսկ նրանք, ովքեր տեսնում են` քաղաքապետն այլընտրանք է առաջարկում. «Դա ինչ խնդիր է, որ: Էդտեղ էլի դպրոց կա, թող հիմա էլ երեխաները 9-րդ դպրոցը չգնան, 25-ը գնան: Ես ընդհանրապես այստեղ խնդիր չեմ տեսնում»,- ասաց Դարբինյանը:

Նրա խոսքով հին կամուրջը վերանորոգելը նպատակահարմար չէ, իսկ նորի կառուցումը ծախսատար է: Դրա համար կպահանջվի 30-35 մլն դրամ:

Մանրամասները` տեսանյութում