Ինչ է թաքցնում կառավարությունը՝ հրաժարվելով ռուսական էժան վարկից

Կառավարության այսօրվա նիստում Տարածքային կառավարման և զարգացման նախարար Սուրեն Պապիկյանը ներկայացրեց որոշման նախագիծ, որով Կառավարությունը հայկական ատոմակայանի երկրորդ բլոկի աշխատանքներն ավարտին հասցնելու համար հատկացրեց 62 միլիարդ դրամ բյուջետային վարկ և հրաժարվեց այդ նպատակով հատկացված ռուսական վարկից։

Վարչապետը ռուսական վարկից հրաժարվելը պայմանավորեց նրանով, որ այդ վարկով իրենք ունեն որոշակի պարտավորություններ ապրանքների ձեռք բերելու և այլնի հետ կապված ու հրաժարվելով ռուսական վարկից ու փոխարենը հատկացնելով բյուջետային վարկ, իրենք կլինեն ավելի ազատ և անկաշկանդ։ Կառավարության ղեկավարի խոսքից գալիս ենք այն եզրահանգման, որ ռուսական վարկը կաշկանդում է այս իշխանությանն ատոմակայանի հետ կապված աշխատանքներն ավարտին հասցնելու համար։ Այդ խնդրից ազատվելու համար հրաժարվում են ռուսական 3 տոկոսանոց վարկից և հատկացնում բյուջետային վարկ՝ 7 տոկոսով։

Որևէ բանական մարդ կարող է 3 տոկոսանոց և 7 տոկոսանոց վարկերի միջև տարբերությունները հասկանալ ու հաշվարկել, թե քանի տոկոսանոց վարկի սպասարկումն է պետության համար ավելի էժան նստում, բայց մինչև տոկոսների մեջ խորանալը հատուկ պետք է ուշադրություն դարձնել և նախագիծը ներկայացնող Սուրեն Պապիկյանի և վարչապետի խոսքին՝ իբրև թե իրենք են հրաժարվում ռուսական վարկից։

Իրականում սակայն կա նաև մեդալի հակառակ կողմը, դեռևս նախորդ տարի ռուսական կողմը դժգոհություններ է հայտնել վարկի ոչ նպատակային և արդյունավետ օգտագործման հետ կապված և ատոմակայանի վերանորոգման աշխատանքների տեմպից։ Այդ մասին նաև իր հարցազրույցներից մեկում հայտնել էր նաև «Ռուսատոմ սերվիս» ընկերության ղեկավարը։

Հիմա տպավորություն է, որ ոչ թե հայկական կողմն է հրաժարվել ռուսական էժան վարկից, այլ ռուսական կողմն է հրաժարվում ծրագրի շարունակականություան ապահովումից։ Հիմա իշխանությունը կաշին փրկելու համար 3 տոկոսանոց վարկը փոխարինում է 7 տոկոսանոց վարկով և դա այն դեպքում, երբ Հայաստանում կորոնավիրուսի համավարակ է, պետությունը փող հավաքելու խնդիր ունի, տնտեսությունը կանգնած է կազմաքանդման եզրին։

Եթե մենք 63 միլիարդ դրամ ունենք ռոսականից հրաժարվելու համար, հարց է առաջանում, թե ինչու այդ գումարը չենք ներարկում տնտեսություն ու օգնում սնանկացման եզրին կանգնած գործարարներին ու կանխում հազարավոր աշխատատեղերի փակվելը, այնպես որ բաց, թափանցիկ, հաշվետու կառավարությունը պարտավոր է հանրությանը բացել փակագծերն ու ասել՝ ինչ է թաքնված ռուսական էժան վարկից հրաժարվելու որոշման տակ։

NewsPress.am