Ես պարոն Ծառուկյանի առաջարկով եմ դարձել փոխվարչապետ. Մհեր Գրիգորյան

Եթե լինեն փաստարկներ, որ կառավարությունը ձախողել է, ապա դրանք կքննարկվեն, իսկ միայն հայտարարությունը չի կարող լինել դիսկուրսի թեմա։ ԱԺ֊ում լրագրողների հետ զրույցում ասաց ՀՀ փոխվարչապետ Մհեր Գրիգորյանը՝ անդրադառնալով ԲՀԿ հայտարարությանը, թե կառավարության կազմը պետք է հարյուր տոկոսով փոխվի։

«Ես պարոն Ծառուկյանի առաջարկով եմ դարձել փոխվարչապետ»,-ասաց նա:

Ինչ վերաբերվում է նրան, որ Ծառուկյանի նշած փաստերը կարող են լինել թեկուզև կորոնավիրուսային հիվանդության ահագնացող թվերը և ներդրումների կրճատումը, ապա Մհեր Գրիգորյանն ունի «արդարացնող» պատասխան` «այսօր ողջ աշխարհում է նույն վիճակը»։

Դիտարկմանը, որ առողջապահության նախարարը երեկ ուղիղ եթերում ներողություն էր խնդրել հապաղելու համար, ապա այստեղ էլ Գրիգորյանը պնդում է` շատ զարգացած երկրներում խոսում են այն մասին, որ ի վերջո, կատարված միջոցառումների և կարանտինային ռեժիմի մասին գնահատականներ պետք է տալ որոշ ժամանակ անց։

Նա մեջբերում է փորձագիտական թեզ, ըստ որի կոշտ կարանտինը տալիս է դրական արդյունք, բայց այն դադարեցնելուց հետո հետևանքները շատ ավելի ծանր են լինում։

«Իհարկե, գոնե ապագայի համար պետք է հասկանալ, թե ինչ է սա նշանակում, և ինչպես է պետք դրա դեմ պայքարել։ Կարծում եմ, որ ուղղակի դրա մասին ոչ թե պետք է խոսել այն ժամանակ, երբ պանդեմիան դեռևս կա, այլ, երբ դա կվերանա։ Ես վստահ եմ, որ դա կվերանա, ու կկարողանանք խոսել պատճառների մասին, ինչպես նաև կասենք՝ քայլերը դրական ազդեցություն ունեցան, թե՞՝ ոչ»,- շեշտեց փոխվարչապետը։