Իշխանությունը ձեռքից գնում է. ԱԱԾ մեկուսարանները լցնել է պետք

Ազգային ժողովի ամենամեծ խմբակցության ղեկավար Գագիկ Ծառուկյանն արդեն մի քանի օր է, ինչ խախտել է իշխանության խաղաքարտերը և պատրաստվում է վարչապետ Նիկոլ Փաշինյանին ու ամբողջ կառավարության հրաժարականի հարցը բարձրացնել, իսկ ի՞նչ է սա, եթե ոչ խայտառակություն արդեն երկու տարի 80 տոկոս լեգիտիմության մասին գոռացող իշխանության համար:

Բնականաբար Գագիկ Ծառուկյանի այս քայլին կմիանան նաև մյուս ընդդիմադիրները խորհրդարանում և խորհրդարանից դուրս, և ձնագնդիի էֆեկտով Փաշինյանի հեռացման պահանջը կբերվի Ազգային ժողովի օրակարգ:

Սա ցանկացած գնով թույլ չտալու համար իշխանությունը գործի է դրել իր մեքենան և մեկուսարանները բեռնաթափում է նոր քաղաքական բանտարկություններ կազմակերպելու համար: Սա դեռ ամենը չէ: 

Այսօր կառավարության ղեկավարը պարետատան նիստից հետո ճեպազրույցից հետո հայտնեց, որ մտածում են հերթական անգամ արտակարգ դրությունը երկարացնելու հարցի մասին:

Որևէ մեկս չենք կասկածում, որ Ազգային ժողովի 88 պատգամավոր լուռ և առանց որևէ առարկության կողմ կքվեարկեն արտակարգ դրությունը ևս 30 օրով երկարացնելու կառավարության նախաձեռնությանը, թեև մեր երկրում վաղուց արտակարգ դրությունն օգտագործվում է միայն քաղաքական նպատակների համար:

Հիմա, երբ ակտիվացել է Փաշինյանի հեռացման պահանջը, խոսում են Վանեցյանն ու Ծառուկյանը և այլ ուժեր, որոնք համախմբվելով կարող են դառնալ մեկ միասնական թիմ՝ ընդդեմ Նիկոլ Փաշինյանի, ճիշտ ժամանակն է հերթական անգամ արտակարգ դրության անվան տակ ատամներով զսպել քաղաքացիների հանրահավաքներ, բողոքի ակցիաներ ու ցույցեր անելու ցանկությունը:

Թեև աշխարհի երկրները իրար հետևից դուրս են գալիս արտակարգ դրության ռեժիմներից և վերադառնում են իրենց բնականոն կյանքին, Հայաստանը շարունակվում է մխրճված մնալ կորոնավիրուսի աճող թվերի, սոցիալական բունտերի ու անկայուն քաղաքական ձղաձգումների կիզակետում;

Արտակարգ դրությունն օգտագործվում է քաղաքական նպատակներով, երկրում ծավալվող դժգոհությունը հիմքում խեղդելու հեռանկարով, որը մինչ այս պահը Փաշինյանին հաջողվում է: Գագիկ Ծառուկյանի և Վանեցյանի հայտնվելն ու ուժային կառույցներում արագ-արագ կատարված փոփոխությունները արագացրեցին մեկ անձի կողմի կառուցված բուրգի փլուզումը, որը անխուսափելի է, ինչը չեն կարող զսպել, ոչ իջևանցի նորանշանակ պաշտոնյաները, ոչ էլ անընդհատ երկարաձգվող արտակարգ դրությունները:

Չեն կարող զսպել, որովհետև Փաշինյանին այլևս չեն հավատում, չեն հետևում նրան, ավելին՝, նա դադարել է ընկալվել, որպես երկրի առաջնորդ. Նա մի մարդ է, որն անընդհատ ստում է, գտնում մեղավորներ, կարդում դատավճիռներ, որոնք քաղաքացու կյանքի որակի վրա որևէ ազդեցություն չունեն:

NewsPress.am