Ցածր թվերից պետք չէ նորից թուլանանք. Արսեն Թորոսյան (տեսանյութ)

«Այս պահին ծանր և ծայրահեղ ծանր վիճակում գտնվող մեր քաղաքացիների թիվը մեծ է, սակայն նոր ծավալումների շնորհիվ դեռ մենք կարողանում ենք նրանց առողջության մասին հոգ տանել»: ֆեյսբուքյան ուղիղ եթերում ասաց առողջապահության նախարար Արսեն Թորոսյանը։

«Եթե հիշում եք մայիսի կեսերին մենք որոշեցինք, որ այն քաղաքացիները ովքեր չունեն սիմպտոմներ կամ ունեն թեթև սիմպտոմներ, տեղափոխենք տնային հսկողության և խնամքի, հյուրանոցներում այլևս չպահենք։ Այնպես ստացվեց, որ այդ պահին 1000 հոգի դուրս գրվելով այդ հաստատություններից համակարգում չնշվեցին որպես առողջացածներ և նրանք գնացին տասնչորսօրյա ինքնամեկուսացման իրենց տներում, որպեսզի այդ ժամկետից հետո տնային բժիշկները նրանց համարեին բուժված։ Այդ ամբողջ տասնչորս օրվա ընթացքում մենք բուժված համարել ենք այն քաղաքացիներին, ովքեր դուրս էին գրվում ուղիղ հիվանդանոցներից կրկնակի բասացական թեստավորումով։

Տասնչորսօրյա ինքնամեկուսացման ավարտի մոտենալուն զուգընթաց՝ Առողջության առաջնային պահպանման հաստատությունները ֆիքսում են այդ 14 օրվա ավարտը և այդ քաղաքացիների բուժման հանգամանքը։ Նույնը տեղի է ունենում նաև նոր գրանցված դեպքերի հետ, որոնք չեն ընդունվում հիվանդանոցային համակարգ, այսինքն, ի սկզբանե բուժվում են տանը։ Հետևաբար, հետևություններ անելիս, պետք է հասկանալ, որ սա պարզապես ռազմավարության փոփոխության արդյունք է և ոչ թե հակահամաճարակային պրոցեսի ինչ-որ ճեղքում»,- ասաց Թորոսյանը։

Նրա խոսքով, այդ թվի մեջ կան քաղաքացիներ, ովքեր դուրս են գրվում հիվանդանոցներից, ծանր ու երկարատև բուժումից հետո, սակայն մեծ տոկոս չեն կազմում։

«Տնային բուժում ստացող քաղաքացիները վերջնական թեստավորում չեն անցնում, նրանք համարվում են բուժված, երբ ավարտվում է տասնչորսօրյա իրենց հսկողությունը, եթե, իհարկե, ընթացքում հոսպիտալիզացիայի կարիք չի լինում և նրանք չեն շարունակում իրենց բուժումը հիվանդանոցային օղակում»,- ասաց Ա. Թորոսյանը։

Նա ընդգծեց, որ այս ցածր թվերից պետք չէ կորցնել զգոնությունը, պետք է շարունակել հետևել կանոններին։

«Մեր ընդհանուր տրամաբանությունը դեռ երկար պետք է մնա վարակի զսպումը, որը կանոններից պահելու զատ գրեթե ոչ մի կերպ հնարավոր չէ։ Այս կանոնները մեզ թույլ են տալու հարաբերականորեն նորմալ մթնոլորտում ապրել դեռ երկար ժամանակ, մինչև կամ վարակը ամբողջությամբ կնահանջի, կամ կունենանք պատվաստանյութը, կամ կստեղծվի դեղորայքային բուժումը»,- ասաց Ա. Թորոսյանը։