Ինչո՞ւ է ջղաձգվել Փաշինյանը. Ծառուկյանի հայտարարությունները «կպել են» թույլ տեղերին

Երեկ տեղի էր ունեցել «Բարգավաճ Հայաստան» կուսակցության քաղխորհրդի հրատապ նիստը. վարել էր կուսակցության ղեկավարը՝ Գագիկ Ծառուկյանը: 

Նրա հայտարարությունները ջղաձգումներով են ընդունել իշխանության ամենամեծիկներն ու ամենափոքրիկները: Ինչպես վերջին շրջանում, այնպես էլ այս դեպքում, փխրուն աղջնակ-խոսնակի հետևում թաքնված թևերին է արել ինքը` վարչապետը, այսպես ասենք, «իշմար» տալով իրենից մանր-մունրներին, որ պետք է «պաշտպանվել»: Իսկ լավագույն պաշտպանությունը, գիտենք՝ հարձակումն է: 

Վրա են տվել ճիրանները սրած, երախները բաց, սրած ատամներով, սովորության համաձայն՝ սպառնալով քրեական գործերով, քաղաքական գործիք դարձած, իրենց ձեռքով ստեղծած օրենքներով և այլն: Ամենևին չենք ցանկանում ստանձնել որևէ մեկի, առավել ևս հարկերից խուսափողի կամ կաշառք տվողի փաստաբանությունը, բայց, ի տարբերություն մանր ու միջին իշխանիկների, հեռու ենք այն մտքից, որ մենք դատավճիռ կայացնողն ենք: 

Եվ ուրեմն, օրենսդիրի ու գործադիրի անդամները, նույնիսկ չիմանալով իրենց տարրական գործառույթները, որոշել են դատական իշխանություն դառնալ բոլոր նրանց գլխին, ում «ռիսկը կհերիքի» ասել, որ իշխանությունը տապալվել է այս երկու տարում, տապալել է տնտեսությունը՝ ներդրումներով, այս կամ այն ցուցանիշներով, հանցավոր անգործությամբ նույնիսկ նպաստել է կորոնավիրուսի տարածմանը, ղարաբաղյան հակամարտությունում հետընթաց է գրանցել և այլն: 

Թե ինչ քրեական գործերով կանցնի Գագիկ Ծառուկյանը, իր, փաստաբանների, քննիչների, դատավորների գործն է, բայց ո՛չ երբեք մերը, Նիկոլ Փաշինյանը կամ, ասենք, Սուրեն Պապիկյանինը: 

Մեզ մնում է քննարկել Ծառուկյանի հայտարարությունների քաղաքական շերտն ու վերլուծել դրանք: Եվ այսպես. ի՞նչ է հայտարարել Գագիկ Ծառուկյանը, որից սկսել են ցավել Փաշինյանի ու նրա թիմակիցների որովայնը: 

Ժողովուրդը փորձադաշտ չէ. պետությունը փորձադաշտ չէ

Ծառուկյանն ասում է, որ ներկայիս կառավարության կազմում կառավարիչներ են, ովքեր «քարը քարին չեն դրել», որևէ ոլորտ չեն ղեկավարել: Սխալվո՞ւմ է Ծառուկյանը: Կարծում ենք՝ չի սխալվում: Եթե հաշվի չառնենք այն մեկ-երկու նախարարին, ովքեր էլ իրենց հերթին, ըստ Փաշինյանի, «Սերժի մնացորդներ են», ապա նոր կառավարությունում երիտասարդ նախարարներից որևէ մեկն իր հարուստ կենսագրությամբ ու առավել ևս պրոֆեսիոնալիզմով, մեղմ ասենք, հպարտանալ չի կարող: Իսկ անփորձներին բերել, այսօր արդեն կրկնակի պատերազմ մղող պետության վրա փորձարկելը, ինչպես կասվեր հայտնի ֆիլմում, «մեղք է»:

Կառավարության կազմը 100 տոկոսով պետք է փոխել 

Գագիկ Ծառուկյանը պնդում է, որ կառավարությունն իր խոստումները 100 տոկոսով ձախողել է: Հատ-հատ չենք թվարկի այն խոստումները, որ Հանրապետության հրապարակից շռայլում էր Փաշինյանը, միայն թե, որպես Հայաստանում ապրող քաղաքացիներ՝ կարող ենք արձանագրել, որ առանձնապես ոչ մի փոփոխություն, այն էլ հեղափոխություն, այն էլ տնտեսական հեղափոխություն չենք տեսնում, բացի այն, որ, ասենք, իշխանության սրտի օլիգարխները գրանցել են իրենց 100 տարվա աշխատակիցներին ու դուրս եկել ստվերից: Բայց դա ներկայացնել որպես աշխատատեղերի ավելացում, կրկին «մեղք է», էլ չասենք, որ տնտեսությունը ճկռել է պարգևավճարների բեռի տակ: Քանի՞ խոշոր ներդրում է եղել Հայաստանում Փաշինյանի վարչապետությամբ և շնորհիվ, քանի՞ աշխատատեղ է բացվել՝ ռեալ, նոր աշխատատեղ: 

Ծառուկյանն իշխանությանը նույնիսկ տալիս է բանալին՝ ներդնողը գնում է երկրներ, որտեղ քաղաքական կայունություն է տիրում: Կայո՞ւն է Հայաստանում քաղաքական իրավիճակը: Երբե՛ք: Ո՛չ մի դեպքում: Հայաստանում հարուստ մարդկանց չեն սիրում, չեն ներում նրանց հարստությունը, ընդ որում՝ անկախ նրանց փողերի օրինական թե ապօրինի ծագումից, ծեփում ու փռում են: Այլ խոսքով՝ Հայաստանում քանի դեռ փռող ու ծեփողների իշխանություն է, նրանց հետ կաշխատեն բացառապես Փաշինյանի առաջ ծռվել-փռվելուն ու հազար կաթսայում եփվել-ծեփվելուն սովոր գործարարները: Իսկ պետությունը դրանից չի շահելու: Իրենք ու իրենց «ախպերները»:

Վարկերի տոկոսների համաներում

2018-ին Հանրապետության հրապարակում վարկերի տոկոսները շահարկելով իշխանության եկած Փաշինյանն այսօր դողպրտում է բանկերի վրա: Նա խոստանում էր ներել տոկոսներ, իսկ մարդիկ մտածում էին, որ վերջապես «սև ցուցակներից» դուրս են գալու, նոր վարկերը լինելու են ցածր տոկոսով և այլն: Բայց քչերի ստացած ներումները չնչին էին, իսկ «սև ցուցակում» հայտնվածների շարքերը գրեթե չնոսրացան: Փաշինյանի սիրած բառով ասած՝ «թուլափայ» ստացան: Այսպիսով Փաշինյանը, ինչպես և սպասվում էր, էական ազդեցություն չունեցավ բանկերի ու նրանց գործելաոճի վրա և մարդկանց թողեց կոտրած տաշտակի առաջ: Դա են վկայում համավարակի օրերին բանկերի առաջ կուտակումները: Դրան կանդրադառնանք հաջորդիվ: 

Արցախի հարց

Երիցս ճի՜շտ է Ծառուկյանը. հատուկ տաղանդ էր պետք ինչպես Հայաստանի և Արցախի հարաբերությունները փչացնելու, այնպես էլ հակամարտության կարգավորման հարցում այսպես խեղճանալու համար: Փաշինյանը նույնիսկ համարձակվեց ձեռք բարձրացնել ՊԲ ղեկավարության վրա, իհարկե, միջնորդավորված, պաշտոնանկությունների տեսքով: Շատ բաներ չենք հիշեցնում ու շատ փակագծեր էլ չենք բացում՝ մեր երկրի անվտանգությանը վնաս չհասցնելու համար: Իսկ հակամարտության ու բանակցությունների ժամանակ գլուխը կախ նստող Փաշինյանը չպետք է հոխորտա, թե՝ «ինչ պետք ա, էն էլ բանակցում ենք»:

Կորոնավիրուսի դեմ պայքար

«Համավարակը սկսել էր հունվարից, բայց մեզ մոտ մինչև մարտի 4-ը ոչ մի խնդիր չէր լուծվել»,- ասում է Ծառուկյանը: Նույնիսկ չենք ուզում հիշեցնել վարչապետի ու նախարարի անպատասխանատու հայտարարություններն ու քարոզարշավը, ուզում ենք տեղեկացնել միայն նրանց շլացնող քայլերի թշվառ հետևանքների մասին: Նախ, միջազգային մամուլի էջերին մերոնք փայլում են իբրև «5 աստղանի կարանտին» անող երկիր, բայց 2-3 ամիս մարդկանց տանը նստեցնելուց հետո, վարակված քաղաքացուն ուղարկում են տուն՝ նրանց վարկը, կոմունալը, սնունդը և, ուշադրություն, նաև դեղերը նրանց գրպանի հույսին թողնելով: Դեռ որևէ կերպ փոխհատուցումն էլ շատ են համարում ու հետքայլ կատարում: 26 հազար դրամների պատմությունն էլ՝ ապացույց: 

Ծառուկյանը խոսում է 3 մլն թեստ անելուց: Զարմացնենք Ծառուկյանին. պարո՛ն Ծառուկյան, Հայաստանում տնային պայմաններում բուժվողին հիվանդության վերջում այլևս չեն թեստավորում, ասում են՝ լավ ես զգում, վե՛րջ, դու ազատ ես, դու էլ չես վարակի: Այդ է պատճառը, որ առողջացածների թվերը խղճուկ են: Չեն թեստավորում նաև վարակիրների հետ ապրողներին, ովքեր, երևանյան կամ մարզային փոքր տներում ապրելու պայմաններում, գրեթե 100 տոկոս դեպքերում չեն կարող խուսափել վարակվելուց: Ի՜նչ 3 մլն թեստի մասին է խոսքը: Օրական 5000 թեստն էլ է շռայլություն մեզ համար:

Ինչ վերաբերում է ֆինանսական կողմին, ապա պարզ չէ՞, որ մի քաղաքացի, ում ոլորտը առ այսօր էլ չի աշխատում, ինքը վարկեր ունի վճարելու, կոմունալներ ունի վճարելու, իսկ տան անդամները վարակված են և նրանց համար սնունդ ու դեղորայք է պետք գնել, չի՛ նայելու՝ ինքը վարակակի՞ր է, թե՞ ոչ, գնալու է ու բանկի դիմաց հերթ կանգնի ու հայտնվի հայտնի ֆոտոշարքում: Պետությունը թքել է իր վրա, երես դարձրել իրենից: Ուրեմն ինքն էլ այդ պետության ղեկավարի հորդորի վրա է թքած ունենալու: 

Եվ ամենակարևորը

Իշխանությունը ցանկացած քննադատություն ընդունում է սվիններով, համագործակցության բոլոր առաջարկները նրա համար մերժելի են. նրա համար վատ է, երբ երկրի համար լավ բան ասողը կամ անողը յուրային չէ, իրենց կուսակիցը չէ, քայլարած չէ: Կորչի՛ պետությունը, կորչի՛ ժողովուրդը, կարևորը հաջորդ ընտրություններում՝ հերթական, թե արտահերթ, մի քանի քվե ավել փախցնելն է: Իսկ նրանց մոտ միայն մի բան է լավ ստացվում՝ քանդելը, արտաքին հարաբերություն քանդելը, բիզնես քանդելը, տնտեսություն քանդելը, կապեր քանդելը և, վերջապես, պետություն քանդելն ու ժողովուրդ պառակտելը: Ծառուկյանի կոչը համախմբումն էր՝ բոլոր մտահոգներին, կառուցողներին, իսկ սրանք պարզապես պառակտիչների խմբակ են: 

Մենք երկիր ենք կորցում

Ծառուկյանի ահազանգը սթափեցման  ազդակ պետք է լինի յուրաքանչյուրի համար: Կորցնում ենք բոլորս, առայժմ գիտակցում ոչ բոլորը...

NEWSPRESS.am