Պուտինը մաստեր կլաս ցույց տվեց

150 միլիոն բնակչություն ունեցող Ռուսաստանի նախագահ Վլադիմիր Պուտինն այսօր հրամանագիր է ստորագրել Սահմանադրության մեջ փոփոխություններ և լրացումներ կատարելու մասին:

Այդ երկիրը հանրաքվե կանի հուլիս 1-ին: Լինելով հեռատես քաղաքական գործիչ՝ վստահաբար կարող ենք պնդել, որ եթե Պուտինը կորոնավիրուսի վարակման դեպքերի թվի աճ նկատեր, չէր գնա հանրության առողջությանը սպառնացող քայլի, չէր նշանակի հանրաքվե, իսկ եթե արդեն օրը նշանակել է, ուրեմն Ռուսաստանում վարակը նահանջ է ապրում ու չի խանգարի հանրաքվեին նախորդող քարոզչությանը ևս:

Էստեղ առաջ է գալիս մի լեգիտիմ հարց՝ ինչպես Ռուսաստանը կարողացավ հաղթահարել կորոնավիրուսի վարակը; Պատասխանը շատ պարզ է՝ պետության ղեկին կանգնած են ոչ թե քայլարածներ, որոնք իրենց կյանքի կենսագրության առաջին տողը սկսում են նախարարի կամ փոխնախարարի պաշտոնից, այլ պետական կառավարման համակարգի բոլոր աստիճաններով անցած մարդիկ, որոնք գիտեն պետության, պետականության արժեքի ու պաշտոնից բխող պարտականությունների մասին:

Ռուսաստանը կարողացավ կորոնավիրուսի պանդեմիան հաղթահարել, որովհետև բոլոր պաշտոնյաները՝ ամենաստորին օղակից մինչև ամենավերինը այս երեք ամիսների ընթացքում աշխատել են ոչ թե ֆեյսբուքյան տիրույթում, այլ իրական կյանքում, իսկ ինչպես գիտենք, աշխատանքը միշտ տալիս է արդյունքներ:

Պատահականությամբ, թե տարօրինակ զուգադիպությամբ Հայաստանում այսօր ընդունվեց մի օրենքի նախագիծ, որով չեղարկվեց հանրաքվեն: Այն իշխանությունը, որը հանրաքվեն համարում էր մեր բոլոր ցավերի դարմանը, այսօր իր ձեռքով չեղարկեց այդ հանրաքվեն: Իշխանությունն իր չեղարկած հանրաքվեն պատճառաբանեց բոլորիս առողջությանը սպառնացող վտանգով:

Այո՛, այդ վտանգը կա: Այն շատ բարձր մակարդակի վրա է գտնվում, մենք անգամ վտանգի պիկին չենք հասել, որովհետև այս երեք ամիսների ընթացքում մենք տեսել ենք անպատասխանատու հայտարարություններ, ֆեյսբուքյան ֆլեշմոբեր, դատարկախոս պաշտոնյաների իրար գերազանցող զառանցանքներ, վհուկների որս, պրոֆեսիոնալ մասնագետների խորհուդների անտեսում, ճգնաժամային կառավարման բացակայություն, ինչը օր օրի հանգեցրեց առողջապական համակարգի կազմաքանդման:

Բանը հասել է նրան, որ վարչապետը հայտարարում է, որ Իտալիայի օրինակին ենք մոտենում՝ առանց շեշտելու, որ եթե Իտալիան այդ սցենարն ունեցավ 60 միլիոն բնակչություն ունենալու դեպքում, ապա Փաշինյան Նիկոլն ու Արսեն Թորոսյանը պետք է ապահովեին ընդամենը 3 միլիոն բնակչի առողջությունը:

Հայաստանը վատ առումով օրինակ է, թե ինչպիսին չպետք է լինեն իշխանությունները, որոնց չի կարելի վստահել ոչ վարակի դեմ, ոչ էլ Ադրբեջանի դեմ պատերազմ:

Հիմա սեփական ձախողումները ծրարելու և կորսվող վարկանիշը չցուցադրելու համար իշխանությունը հանրաքվեի գաղափարից հրաժարվեց: Հանրաքվեն չեղարկելու միակ պատճառը իշխանության ձախողումներն են, որոնք ուղիղ համեմատական են Փաշինյանի վարկանիշիին:Այնպես որ Պուտինը հանրաքվեի օր նշանակելով իսկակակն մաստեր կլաս ցույց տվեց Հայաստանի իշխանությանը:

NewsPress.am