Ճամպրուկները հավաքելու ժամանակը

Իշխանությունը շարունակում է համառորեն մերժել երկրում նոր կառավարության ձևավորման անհրաժեշտությունն այն դեպքում, երբ ամեն օր կորոնավիրուսի ավելացող թվերն ու վարակի հասցրած աղետալի հետևանքները պահանջում են րոպե առաջ ազատվել իշխանությունից:

Անհասկանալի է, թե այլևս ինչ պետք է լինի Հայաստանում, որ իշխանությունը համարի, որ տապալել է բոլոր ոլորտներում իր գործունեությունը, երկիրը կանգնեցրել կառավարման ճգնաժամի առաջ ոչ միայն կառավարման փորձ չունենալու, այլ սովորելու ցանկություն չունենալու հետևանքով:

Ամեն օր երկրում ունենում ենք հարյուրավոր մահեր այն ժամանակ, երբ կորոնավիրուսի վարակակիրների թվերով աշխարհի ամենավատ վիճակում գտնվող երկրներում օր օրի թվերը նվազում են, վերացվում են արտակարգ դրության ռեժիմները, իսկ մեզ մոտ տեղի է ունենում ճիշտ հակառակը՝ հարյուրավոր վարակակիրներն ու վերահսկողությունից դուրս գտնվող իրավիճակը բերել է նրան, որ նախարար Արսեն Թորոսյանն ահազանգում է՝ ամեն օր աճող թվեր հրապարակելով:

Կառավարությունը որոշեց կորոնավիրուսի դեմ պայքարել՝ առանց մասնագետների հետ քննարկումներ անելու, մնաց միայնակ իր աղքատիկ կադրային բազայի հետ, մնաց ոչ մասնագետ Արսեն Թորոսյանի խորհուրդների հույսին, հավատաց, որ կարող է առանց ոլորտային մասնագետների հետ աշխատանքային խումբ ձևավորելու հաղթել կորոնավիրուսին ու սխալվեց, իսկ այդ սխալն արժեցավ մահեր, առողջապահական համակարգի կոլապս, տնտեսական ծանր վիճակ, հացի խնդիր, սոված քաղաքացիներ:

Ահա սա է այն Հայաստանը, որում մենք այսօր ապրում ենք, հետևաբար հարց է առաջանում, թե իշխանությունն ինչի վրա է դրել հույսը, երբ կործանման եզրին հայտնված երկիրը փրկողներին շարունակում է համարել ռևանշիստ:

Արդյոք ռևանշ է համարվում երկրի փրկությունը, վարակակիրների թվի նվազումը, ամբողջ երկիրը հոսպիտալ դարձնելը թույլ չտալը:

Ու հիմա ընտրությունը ժողովրդինն է, ինքը պետք է որոշի կամ իրեն այս վիճակում հայտնված իշխանությունից պահանջել կոնկրետ պատասխանատվություն և ոչ թե ֆեյսբուքյան ուղիղ եթերներ, կամ նրանից պահանջել հավաքել ճամպրուկները, իսկ դրանք հավաքելու ժամանակը իսկապես եկել է:

Իշխանությունը պետք է կամք գտնի գնալ ճամպրուկները հավաքելու ճանապարհով, թույլ տա այս երկու տարվա ընթացքում ձևավորած առողջ ուժերին ձևավորել անցումային կառավարություն, համախմբել բոլոր մասնագետներին ու անել մի պարզ խոստովանություն. Ինքը սխալ էր:

NewsPress.am