Դեպի բռնապետություն կես քայլ է մնացել

Թավշյա ոչ բռնի հեղափոխություն տեսած Հայաստանում բանը հասել է նրան, որ հիմա արդեն փաստաբանների տուն են այցելում ինչ-որ խմբավորման անդամներ, սպառնում նրանց կանանց ու երեխաներին:

Պարզվում է, որ երբ փաստաբան Տիգրան Աթանեսյանն ընդդիմադիր Նիկոլ Փաշինյանի շահերն էր պաշտպանում դատարանում, այն ժամանակ՝ Սերժի Հաայաստանում, որևէ փաստաբանի՝ այդ թվում Նիկոլի նման ընդդիմադրի, չէին սպառնում, նրանց կանանց ու երեխաներին չէին վախեցնում, դա հնարավոր եղավ միայն այն Հայաստանում, որի ղեկավարն ամեն ֆեյսբուքյան ուղիղ եթերում չի հոգնում կրկնել, որ սիրում է բոլորին, հպարտանում է բոլորով, համբուրում է բոլորին:

Պարզվում է, որ հերթական ավազակախումբը գործի է դրվել որպես ընդդիմադիր հայացք ունեցողին ճնշելու միջոց, իր քաղաքականությունն ու իր տրամաբանությունը չկիսող մարդուն ճնշելու տարբերակ: Փաստաբանին ճնշելու կամ ճնշման փորձ անելու համար փաստորեն երկրում խմբակներ են գործում, որոնք ֆաս հրահանգով պատրաստ են հարձակվել ու խեղդել ցանկացած մեկին, եթե այդ մեկը ջրի երես է հանում իրենց դատարկությունը:

Ինչ է սա, եթե ոչ ավտորիտաիզմի իսկական օրինակ, որի դեմը չառնելու դեպքում շատ արագ երկիրը կկանգի բռնապետական համակարգի առաջ, իսկ գլխավոր բռնապետ կկարգվի Նիկոլ Փաշինյանը:

Հետաքրքիր է, որ ավտորիտար Հայաստանում այլևս վերացված են բոլոր սրբությունները և կարելի է հարձակվել փաստաբանի տան վրա այն ժամանակ, երբ նա տանը չէ, երբ կինը մանկահասակ երեխաների հետ միայնակ է և կարելի է կնոջը ու երեխաներին հայհոյել: Ավտորիտար երկրներում ֆաս հրահանգով գործող խմբակները թքած ունեն բոլոր տեսակի սրբությունների վրա, որովհետև նախ իրենք են անսուրբ և հետո դրված է հստակ նպատակ՝ հնարավորինս դուր գալ տիրոջը:

Սա վկայում է արդեն ոչ թե պետության, այլ փողոցապետության և խուժանապետության գոյության մասին, որտեղ ընդդիմախոսը կամ պետք է հայտնվի բանտում, կամ ատելության թիրախում, կամ էլ մշտապես գտնվի ֆիզիկական բռնության սպառնալիքի առաջ: Այո այսպիսինն է Նիկոլ Փաշինյանի կերտած Հայաստանը, որտեղ ընդդիմադիրները կամ փռված են ասֆալտին, կամ վախեցած, կամ ծախված:

NewsPress.am