Ուղղակի անբարոյականություն է սեփական տապալումը, անգրագիտությունը բարդել մեր ժողովրդի վրա. քաղաքագետը՝ կորոնավիրուսի դեմ պայքարի մասին

Իսկ հիմա՝ ավելի լուրջ հարցերի մասին: Այդպես է ֆեյսբուքյան իր գրառումը վերնագրել քաղաքագետ Արթուր Ղազինյանը: 

«Վրաստանում մեկ օրվա ընթացքում հայտնաբերվել է 1 վարակակիր, ինչը ի ցույց է դնում Փաշինյանի, Ավինյանի ու Թորոսյանի ձախողումն ու տապալումը։

Նրանք ձախողել ու տապալել մեր կյանքին ու առողջությանը սպառնացող վտանգի՝ կորոնավիրուսի դեմ պայքարի պետական քաղաքականությունը։

Սակայն նրանց ցինիզմն ու լկտիությունը հասել է այն աստիճանի, որ որպես իրավիճակի մեղավոր հռչակում են մարդկանց, ժողովրդին։ Վստահ եմ, որ նրանք գիտակցում են, որ սրանով վիրավորում են մի ամբողջ ժողովրդի և անուղղակիորեն պնդում են, որ վրացիներն ավելի կազմակերպված, խելացի ու գրագետ են, քան մենք՝ հայերս։

Ուղղակի անբարոյականություն է սեփական ձախողումը, տապալումը, անգրագիտությունն ու անլրջությունը բարդել մեր ժողովրդի վրա, քանի որ ՀՀ քաղաքացիները լսել և ենթարկվել են իշխանությունների բոլոր հրահանգներին։ Երբ պետության ղեկավարն ու առողջապահության նախարարն ի լուր աշխարհի հայտարարում էին, որ սա սովորական գրիպ է, և ծաղրում, թե հիմա բոլորին վարակելու է, դա լսում էին բոլորը, իսկ երբ լրջացան ու հայտարարեցին արտակարգ դրություն և կիրառեցին համընդհանուր մեկուսացում, արդեն ուշ էր։

Պարետատուն փաստացի գոյություն չուներ, չէր կատարում իր գործառույթը, քանի որ Փաշինյանը փախել էր պատասխանատվությունից և այն վստահել կառավարման փորձ չունեցող երիտասարդին, ով 5 օրում հազիվ կարողացավ թեժ գիծ ստեղծել։

Իսկ առողջապահության էքսցենտրիկ նախարարի մասին ես կլռեմ, քանի որ ամեն ինչ արդեն ասվել է։

Հիմա ես ուզում եմ արձանագրել, որ կորոնավիրուսի համաճարակի առողջապահական և տնտեսական բոլոր հետևանքների համար անմիջականորեն պատասխանատու են Նիկոլ Փաշինյանը, Տիգրան Ավինյանն ու Արսեն Թորոսյանը։ Յուրաքանչյուր մահի համար պատասխանատու են այս երեքը։

Պատասխանատվությունից խուսափել ոչ մեկին չի հաջողվելու, իսկ իրենց մեղքը ժողովրդի վրա բարդելու բոլոր փորձերը էլ ավելի են խորացնելու նրանց պատասխանատվության աստիճանը»։