«Էս ի՞նչ վախ է, որ թույլ չեք տալիս մարզերից նստեն ու գան». Րաֆֆի Հովհաննիսյան

Հայենիքը մեծ է և ամբողջական, պայքարը` հաղթանակ է: Այդ մասին «Նոր Հայաստան» փրկության ճակատի կողմից հրավիրված համազգային հանրահավաքի ժամանակ հայտարարեց Նոր Հայաստան հանրային ճակատի անդամ, Ժառանգություն կուսակցության նախագահ Րաֆֆի Հովհաննիսյանը:
Նրա խոսքով ժողովրդի միասնականության շնորհիվ այս հրապարակը դառնալու է մեկ միացյալ հրապարակ:

«Այսօր «Նոր Հայստանը» երկունքի մեջ է և հանրապետական կուսակցությունն ապրում է իր վերջին օրերը: Իշխանության ջղաձգումները, որ տեսնում ենք հեռուստատեսությամբ, տանում են պատերազմի սեփական երկրի դեմ»,-հայտարարեց Րաֆֆի Հովհաննիսյանը` նշելով, որ թույլ չեն տա հանրապետականներին ամրապնդել իրենց կուսակցապետությունը:

Ժառանգության առաջնորդը նկատեց, որ չնայած իշխանական թևի ներկայացուցիչները խոսում են ընդդիմության վարքից, սակայն իրենց կատարած անօրինությունների համար կանգնելու են օրենքի առաջ, քանի որ բոլորը պետք է հավասար լինեն Սահմանադրության առաջ:

«Ամեն մեկս այսօր առաջնորդ ենք և մի ճամփա ենք բռնել, որը բերելու է ազատ ու ինքնիշխան Հայաստանի: Այն կարող է լինել զոհողության ճանապարհ, բայց կլինի հաղթանակի, հարության և ՀՀ ելման ճանապարհ»,-իր ելույթում հայտարարեց Րաֆֆի Հովհաննիսյանը:

Նա ոստիկաններին հորդորեց ապահովեն ՀՀ քաղաքացու անվտանգությունը և արյան աղբյուրները այլ տեղ փնտրել, քանի որ նրանք պատասխանատու են յուրաքանչյուրի մի կաթիլ արյան համար:
«Էս ի՞նչ վախ է, որ թույլ չեք տալիս մարզերից նստեն ու գան սահմանադրության մասին տեղեկատվություն ստանալու համար»,- նկատեց Րաֆֆի Հովհաննիսյանը` հավելելով, որ նա ով փակել է ճանապարհը խախտել է օրենքն ու սահմանադրությունը, որի համար պատասխանատվության կենթարկվի:

«Դա ցույց է տալիս, որ մեզ մոտ ազատ քվե գոյություն չունի: Բայց պետք է քայլենք հանդարտ, քայլ առ քայլ: Այս միասնական հանաքվեն դառնալու է Սերժ Սարգսյանի ու իր վարչակազմի հրաժարականը: Մենք հասնելու ենք հաղթանակների»,- եզրափակեց իր ելույթը ժառանգության առաջնորդը: