«Տհաճ է, որ քաղաքացիներին այսօր անհարմարություն է պատճառվել». Վահագն Գևորգյան (տեսանյութ)

Աբովյանցիներից շատերը տաքսիներով կամ սեփական մեքենաներով հասել են Երևան, մասնակցելու են հանրահավաքին: Newspress.am-ի հետ զրույցում աբովյանցիները նշեցին, որ չնայած առավոտվանից Աբովյան-Երևան երթուղայինները չեն աշխատում, բայց, իշխանություններն իրենց նպատակին չեն հասել:

«Քինգ ԴեԼյուքս» ընկերության ներկայացուցիչը լրատվամիջոցների հետ զրույցում նշել էր, որ երթուղիները չեն աշխատում, քանի որ ոստիկանությունն է հրահանգել անվտանգությունից ելնելով: Ոստիկանությունն իր հերթին հերքել էր:

Newspress.am-ի հետ զրույցում Աբովյանի քաղաքապետ Վահագն Գևորգյանն էլ վստահեցրեց, որ քաղաքային իշխանությունը կապ չունի ուղևորափոխադրումներ չիրականացնելու հետ: Նա ասաց, որ քաղաքապետարանի տիրույթում է ներքաղաքային տրանսպորտի հետ կապված հարցերը, բայց այնուամենայնիվ աշխատակազմին հանձնարարել է պարզել, թե ինչու միջքաղաքային և մարզային տրանսպորտը չի աշխատում:

«Զեկուցվել է, որ ընկերությունները կատարում են ձմեռվա նախապատրաստական աշխատանքներ, Կոտայքում և Աբովյանում առաջին ձյունն է տեղացել: Տեխնիկական թերությունները կշտկվեն և վաղվանից տրանսպորտը նորմալ կաշխատի»,- վստահեցրեց նա:

Աբովյանի քաղաքապետի խոսքով` այս ամենը բնակիչների հանրահավաք գնալ-չգնալու հետ կապ չունի, ընդամենը պատահականություն է, որ հենց այսօր են տեխնիկական խնդիրներ առաջացել:

Վահագն Գևորգյանը նաև ասաց, որ իր համար ևս տհաճ է, քանի որ բնակիչներին անհարամարություն է պատճառվել. շատերը չեն կարողացել գնալ դասի, շատերն էլ  չեն կարողացել գնալ աշխատանքի:

Մանրամասները` տեսանյութում: