Իմ որոշմամբ են բարձրացել պետական ծառայողների և պաշտոնյաների աշխատավարձերը. Փաշինյան

Ծայրահեղ աղքատության մակարդակը նույն ժամանակահատվածում նվազել է 1.4-ից մինչև 1 տոկոս։ ԱԺ-ում ասաց ՀՀ վարչապետ Նիկոլ Փաշինյանը՝ ներկայացնելով ՀՀ կառավարության 2019 թվականի ծրագրի կատարման ընթացքի ու արդյունքների մասին զեկույցը։

«Ես ուզում եմ հիշեցնել, որ «Իմ քայլը» դաշինքի նախընտրական ծրագրում որպես նպատակ արձանագրված է ծայրահեղ աղքատության վերացումը՝ մինչև 2023 թվականը։ Եվ եթե մեզ հաջողվի այս տեմպով առաջ շարժվել, ապա դա մենք կկարողանանք անել»,- շեշտեց Փաշինյանը։

Նրա խոսքով, 2018 թվականի մայիսից մինչ օրս, ավելի քան 1 մլն 100 հազար մարդու կա՛մ աշխատավարձը, կա՛մ նպաստը, կա՛մ թոշակը բարձրացել է։

«Ես էլի ուզում եմ անդրադառնալ պետական ծառայողների և պաշտոնյաների աշխատավարձերի բարձրացմանը։ Այո, իմ որոշմամբ է դա տեղի ունեցել, և դա տեղի է ունեցել, որովհետև Հանրապետության հրապարակի հեղափոխական հարթակից ես խոստացել եմ, որ պետական ծառայողների աշխատավարձերը կբարձրանան, և այդ խոստումն ի կատար է ածվել։ Ինչո՞ւ պարգևավճարների համակարգով, այլ ոչ աշխատավարձերը բարձրացնելով, քանի որ գործող աշխատավարձերի համակարգը իր ստեղծման առաջին օրից դեֆորմացված է։

Եվ այսօր մենք հանրային ծառայության բարեփոխումների շրջանակում պարգևավճարները կտրանսֆորմացնենք դեպի աշխատավարձի համակարգ։ Ուզում եմ ասել, որ մենք պլանավորում ենք պետական կառավարման համակարգում՝ հատկապես դատաիրավական համակարգում ավելացնել աշխատավարձերը, քանի որ համոզված ենք, որ դա է ճանապարհը արդյունավետ, անկախ դատական համակարգ ունենալու»,- շեշտեց Փաշինյանը։