Մենք ահազանգ չունենք, որ ՀԴՄ-ներ չկան շուկայում. Փաշայան

«Մինչև համավարակի ի հայտ գալն աշխատակիցները հաճախ ուշադրություն չեն դարձրել, թե ինչքան կարևոր է այն եկամուտը, որ ստանում են գործատուի կողմից, ֆիքսված լինի պետության կողմից, որովհետև երբ հարցը հասնում է նրան, որ պետությունը պետք է աջակցություն ցուցաբերի հենց աշխատակցին, նայելու է այն տվյալներին, որոնք գոյություն ունեն ՊԵԿ եկամատահարկի հաշվարկի մեջ»:

Այս մասին ասուլիսում ասաց Պետական եկամուտների կոմիտեի նախագահի տեղակալ Միքայել Փաշայանը:

Նա  ընդգծեց, որ կառավարության համար կարևոր է, որպեսզի ընտրվի իրական թիրախ՝ իրական տուժած ոլորտը, իրական տուժած ընտանիքը, այն աշխատողները, որոնք կորցրել են աշխատանքը։

Պատասխանելով հարցին, թե  արդյո՞ք ՊԵԿ-կառավարություն քննարկում են հարկային արձակուրդներ կամ հարկային դրույքաչափերի փոփոխության հարցն արտակարգ դրության պայմաններում առավել տուժած ոլորտների համար, Փաշայանը ասաց, որ ամբողջ տնետեսության ունի իր շղթան։

«Եթե հարկը ներում են, օրինիակ, մի տնտեսվարողի, եկամտահարկը չի վճարում աշխատողին, որն ունի հիփոթեք, տոկոսները փոխանցում են եկամտային հարկով։ Այդ տոկոսները չեն վճարվում բանկին, բանկն ավելի վատ վիճակում է հայտնվում։ Այսինքն՝ տնտեսական շղթան խաթարվում է։ Կորոնավիրուսի հետևանքների չեզոքացման մի քանի միջոցառումներ կան, որոնք աջակցում են կազմակերպություններին»,- ասաց Փաշայանը:

Ինչ վերաբերվում է նրան, որ նոր սրենդի ՀԴՄ-ներ այս պահին չկան կամ բարձր գնով են վաճառվում, Փաշայանը նկատեց, որ հնարավոր է կորոնավիրուսով պայմանավորված ապարատների ներմուծման հետ կապված խնդիր կա,  բայց ահազանգ չունեն:

«Մենք ահազանգ չունենք, որ ՀԴՄ-ներ չկան շուկայում։ Շուկան ազատականացված է։ Շուկայում ՊԵԿ-ի կողմից եզրակացություններ ունեցող կազմակերպություններ կան։ Սա արդեն շուկայական հարաբերություններ են»,-ասաց Փաշայանը: