«Կոսմետիկ փոփոխություններով չի կարելի ժողովուրդ կերակրել». Արմեն Մկրտչյան

Սահմանադրության փոփոխության դեպքում ԱԺ պատգամավորների թեկնածուներին առաջադրվելու է հայոց լեզվի թեստ հանձնել: Այս մասին գավառցիների հետ զրույցում ասաց «Այո և ոչ» իրապատման «Հյուսիս» ուղղության քարոզարշավի մասնակից ՀՀԿ-ական Սամվել Ֆարմանյանը` հավելելով, որ սա շատ կարևոր առավելություն է:

Այս կետում Ֆարմանյանի հետ «Ոչ»-ի կողմնակից «Հայազն» կուսակցության անդամ Արմեն Մկրտչյանը լրիվ համաձայն էր:
Նա նկատեց, որ Ֆարմանյանը շատ ճիշտ դիտարկում արեց «անգրագետ պատգամավորների վերաբերյալ», սակայն չբացառեց, որ տարաբնույթ ընտրություններ կեղծած իշխանությունները կարող են կեղծել նաև հայոց լեզվի թեստերի արդյունքերը:

«Նման կոսմետիկ փոփոխություններով չեմ կարծում, որ կարելի է ժողովուրդ կերակրել»,-նկատեց Մկրտչյանը` հավելելով, որ եթե կան մարդիկ, ովքեր հավատում են, թե մի գիշերվա մեջ իշխանությունները կարող են փոխվել, թող գնան ու «այո» ասեն. «մի երկու տարի հետո իմ սերնդի առաջ իրենք են պատասխանատու լինելու, միայն իշխանությանը չի մնալու պատասխանատվությունը»,- նկատեց Մկրտչյանը:

Հիշեցնենք, որ «Այո և ոչ» իրապատման «Հյուսիս» ուղղության քարոզարշավի մասնակիցները Գեղարքունիքի մարզի Գավառ քաղաքում են: