«Եթե քաղաքապետը տեղում լինի՝ կընտրվի». Վանաձորի քաղաքապետի հույսը «խաղաղ» հանրաքվեն է

 Սահմանադրության փոփոխությունների հանաքվեին ընդառաջ՝ Վանաձորում բողոքի ցույցեր չկան, ամեն ինչ հանդարտ ու խաղաղ է: Newspress.am-ի հետ զրույցում այդ մասին տեղեկացրեց Վանաձորի քաղաքապետ Սամվել Դարբինյանը: Վերջինս բացատրեց. «ամեն կուսակցություն իր գործն է անում: Բացատրական աշխատանքներ է տարվում, թե ինչու պետք է «այո» ասել սահմանադրությանը: Յուրաքանչյուր քաղաքացի ինքը պետք է որոշի այո ասել, թե ոչ»,- ասաց քաղապետը:

Մինչ Սամվել Դարբինյանը պնդում է, որ իր քաղաքաի բնակիչները ո’չ բոյկոտելու, ու ո’չ էլ ցույցերի մտադրություն ունեն, քանի որ իր քաղաքում «Այո»-ն վճռված է, վանաձորցիներն իրենց հարաբերական հանգիստը այլ գործոնով են բացատրում: Նրանք վիճակը որակում են որպես անտարբերություն: Համենայնդեպս նրանցից շատերը newspress.am-ի հետ զրույցում նկատեցին. «մեկ ա, իշխանություններն իրենց այո-ն են անցկացնելու»:

Մասնավորապես Վանաձորի բնակիչ Մ. Մանուկյանը նկատեց. «մարդիկ էնքան դարդ ու ցավ ունեն, ոչ ուզում են էդ թեմայով խոսել, ոչ էլ ուզում են հանրաքվեին պատրաստվել: Ինչ ուզում ա անեն»:

Ն. Մկրտչյանն էլ ասաց, որ շատերը վստահ են` անկախ իրենց քվեարկությունից՝ «այո»-ն է անցնելու`«մինչև հիմա ի՞ նչ է եղել, որ սրանից հետո էլ լավ լինի: Մենակ խոստումներ են տալիս: Հեն ա, տղես թոռներիս առել փախել ա էս երկրից: Ի՞ նչ սահմանդրություն. հերն էլ անիծած: Ուզում են անցկացնեն, ուզում են՝ չէ»:

Իր քաղաքացիների շրջանում բուն դրած այս անտարբերությունն ու անվստահության մթնոլորտը սակայն, կարծես քաղաքապետը կամ չի նկատում, որը խոսում է վանաձորցիների խնդիրների նկատմամբ իր իսկ անտաբերության մասին, կամ էլ թքած ունի, որ վանաձորցիները տրտնջում են իրենց վիճակից: Ավելին՝ նա պատրաստվում է եկող տարի ևս ՏԻՄ ընտրություններում իր թեկնածությունն առաջադրել: Ու եթե նախկինում Սամվել Դարբինյանն իր հաղթանակի հույսը կապում էր իր իսկ խոսքով «վանաձորցիների 30 տոկոսի հետ, ովքեր իր բարեկամներն ու ազգականներն են», ապա սահմանադրության հնարավոր փոփոխության դեպքում նա ակնկալիքներ ունի ավագանուց: Քանի որ այս դեպքում ժողովուրդն ընտրելու է ավագանի, ու ավագանու անդամներից էլ նշանակվելու է քաղաքապետը: Այս պարագայում արդեն, դժվար է ասել, թե ինչ ենթատեքստ ուներ Սամվել Դարբինյանի այն արտահայտությունը` «եթե քաղաքապետը տեղում լինի՝ կընտրվի»: