Ծայրահեղ ծանր վիճակում գտնվում է 10, արհեստական օդափոխության սարքին միացված` 5 քաղաքացի, նրանցից մեկը 27 տարեկան է

Կարծես երկիրը բնականոն հունի մեջ է, սակայն պետք է չէ թուլանալ, քանի որ դրանք կարող են նոր բռնկումներ առաջացնել։ Այս մասին կառավարության նիստի ժամանակ հայտարարեց Առողջապահության նախարար Արսեն Թորոսյանը։

Նա նաև տեղեկացրեց, թե ինչ փուլում է այսօր հիվանդությունը Հայաստանում։

«Երեկոյան տվյալներով՝ 50 նոր հաստատված դեպք կա, բուժվել է 26 քաղաքացի: Դեպքերի գումարային թիվը 1523 է: Այս պահին ակտիվ բուժման մեջ է գտնվում 840 քաղաքացի, բուժվածների ընդհանուր թիվը 659 է, մահերի ընդհանուր թիվը` 24: Այս պահին ունենք ծայրահեղ ծանր վիճակում գտնվող 10, թոքաբորբով՝ մոտ 230, արհեստական օդափոխության սարքին միացված՝ 5 քաղաքացի, նրանցից մեկն է, որ բավականին երիտասարդ է` 27 տարեկան, սակայն ունի քրոնիկ բնածին հիվանդություն: Բժիշկներն ամեն ինչ անում են, որ իրավիճակը կայունացնեն, կարծես թե, հույսեր կան, որ կկարողանանք կյանքը փրկել»,-ասաց Թորոսյանը:

Նա հավելեց, որ մահճակալային ֆոնդի առումով դեռ ծանրաբեռնվածությունն այնպիսին չէ, որ այլ տարբերակի անցնեն, սակայն չպետք է կորցնել զգոնությունը: