«ՍԱՍ»-ի Արտակը նոր «հրովարտակով» գործին է խառնել հարազատ-բարեկամներին

Սահմանադրական փոփոխությունների հանրաքվեի քարոզարշավը աստիճանաբար մոտենում է եզրագծին՝ թեժացնելով պայքարը «այո»-ի ու «ոչ» – ի կողմնակիցների միջև։

Եթե վերջիններս կոչ են անում, որպեսզի ժողովուրդն իր ամուր «ոչ»-ն ասի սահմանադրական փոփոխություններին, «այո»-ի ջատագովները գործի են դրել հին ու փորձված մեթոդները ու սպառնալիքների ուժով արդեն էս գլխից ցանկանում են կանխորոշել հանրաքվեի ճակատագիրը։

Newspress. am-ի ստացած հերթական ահազանգը ՍԱՍ սուպերմարկետների ցանցի աշխատակիցների կողմից էր։ Մարդիկ վրդովված են ու վախեցած։ Բողոքում են «ՍԱՍ» սուպերմարկետների ցանցի սեփականատեր, «ՍԱՍ» գրուպի նախագահ «ՍԱՍ»-ի Արտակի կամայականությունների դեմ, նաև խնդրում, անուններ չհրապարկել, թե չէ…
Բանը նրանում է, որ Արտակ Սարգսյանը՝ «ՍԱՍ»-ի Արտակը, կարծես թե կորցրել է ժամանակի ընկալումը։ Իրեն ամենակարող տեր է կարծում, իսկ իր խանութների ցանցի աշխատակիցներին՝ ստրուկների կարգավիճակում է դրել, որոշելով իր կամքն ու կարծիքը թելադրել նրանց։

Իշխանությանը սիրաշահելու ու թիվ կպցնելու համար Արտակը «հրովարտակ» է իջեցրել՝ կարգադրելով, որ «իր» աշխատողներից ամեն մեկն իրենից բացի ևս 3 «այո»-ի հավակնորդ հարազատ-ազգականի, ընկեր – բարեկամի անուն պիտի բերի։ Անուններն էլ՝ ոչ թե ցուցակով, ուղղակի անձնագրի տվյալներով ու հեռահոսահամարներով պիտի լինեն, այլ անպայման՝ ամեն մեկի անձնագրի ու հանրային ծառայությունների համարանիշի`սոցիալական քարտի պատճենով։

Չենթարկվողներին սպառնում է դաժան պատիժ. թիվ չբերողներն ուղղակի կազատվեն աշխատանքից։

Կուսակցությունից կուսակցություն ժամանակ առ ժամանակ թռիչքներ կատարող գործարարի համար, անշուշտ, իր տեղը ներկայիս կարգավիճակում պահելու համար հույժ անհրաժեշտ է տարաբնույթ մեթոդներով սիրաշահել իր հովանավորյալներին։ Սակայն, անհասկանալի է չափից ավելի անհանգստությունն ու չափն անցնելը, «թիվ խփելու» ու «կպցնելու» այսչափ ջանասիրությունը։ Իսկ գուցե մոռացե՞լ է, կամ ավելի ճիշտ՝ չգիտի, որ ՀՀ ամեն մի քաղաքացի ունի ազատ ընտրության իրավունք, ինչն ամրագրված է ՀՀ սահմանադրությամբ։ Իսկ մարդկանց, սպառանալու ու ահաբեկելու համար ՀՀ քրեկան օրենսգրքով սահմանված է պատիժ՝ ընդհուպ մինչև ազատազրկում։