Ի՞նչ կապ ունի Հովհաննեսն այս պարտադրված ուղիղ եթերի հետ

Այսօր կեսօրին կառավարության ղեկավար Նիկոլ Փաշինյանը ֆեյսբուքյան անոնս արեց և ի լուր աշխարհի հայտարարեց, որ 20:00-ին հեռուստատեսային ելույթ է ունենալու և խոսելու է կորոնավիրուսի տնտեսական հետևանքների մասին:

Բոլորը շունչները պահած սպասում էին Փաշինյանի ելույթին և մտածում, որ վստահաբար հույժ կարևոր բան է կատարվել կամ կատարվելու, որի համար վարչապետը պետք է օգտագործի պետական ռեսուրսն ու հարկատուների վճարած հարկերով ապրող հեռուստաընկերության 30 թանկ րոպեները:

Ավաղ, դա տեղի չունեցավ: Հիասթափությամբ պետք է փաստենք, որ վարչապետն ուղիղ եթեր էր մտել կառավարության ընդունած 13 ծրագրերի մասին նորից պատմելու և կորոնավիրուսով չվարակվելու համար 2 մետր հեռավորություն պահելու մասին պատմելու համար:

Վարչապետը թանկ եթերաժամանակն օգտագործեց նաև բացահայտելու համար, որ դեմքին ձեռքով չի կարելի դիպչել: Իրականում սա արդեն ծիծաղելի էլ չէ, սա ցավալի իրականություն է, որի մեջ արդեն երկու տարի է ապրում ենք բոլորս:

Այո, բոլորս ապրում ենք էժանագին շոուների մեջ: Բայց սա միայն այդ շոուի ցուցադրություն չէ: Վարչապետը ստիպված է նաև կառավարության ՊՈԱԿ-ի աշխատանքն անել ու զբաղվել կառավարության ընդունած ծրագրերի և որոշումների հանրայնացմամբ: Բանը հասել է նրան, որ Փաշինյանը կառավարության նիստի ժամանակ մի լավ ամոթանք տվեց ՊՈԱԿ-ի տնօրեն Հովհաննես Մովսիսյանին ու հենց նիստի ժամանակ սկսեց նրան բացատրել, թե ինչպես պետք է գործ անել ու ապահովել իր որոշումների համար 3 միլիոն դիտում:

Ասացեք՝ արդյոք սպառված չէ՞ այն երկրի վարչապետը, որը ստիպված է նաև հանրային կապերի պատասխանատուների աշխատանքն անել, քանի որ նրանցից այլևս հույս չկա:

Այո, սպառված է, այնպես որ Փաշինյանի ուղիղ եթերն իր խորը պատճառներն ունի, դա ճարահատյալ եթեր էր խորտակվող նավից եղունգներով ճանկռելով փրկվելուց առաջ ու պետք չէ զարմանալ, որ եթերով մենք որևէ նոր բան չլսեցինք, չէինք էլ կարող լսել, քանի որ նոր բան լսելու համար նախ այդ նոր բանը պետք է անել, գործել, ավաղ մեզանում միայն խոսելու տարբերակն է գործում: Հուսանք՝ Փաշինյանի այս եթերից հետո Մովսիսյանը կհասկանա, որ ֆեյք պահելով հարց չի լուծվում, լուրջ և ծանր գործով է պետք զբաղվել:

Եվ վերջում, որպես վերջաբան՝ ուզում ենք հիշեցնել որ ժողովրդի վարչապետի ոչինչ չասող եթերի ապացույցն այն է, որ այդ ուղիղ եթերին հետևում է ընդամենը 5900 մարդ: Հետևությունները թողնում ենք ձեզ...

NewsPress.am