Մարուքյանն անձամբ համաձայն չէ վեհափառի կարծիքին, բայց դա «հայոց հարց» դարձնելն ու եկեղեցու դեմ արշավ սկսելն՝ անընդունելի է համարում

ԱԺ «Լուսավոր Հայաստան» խմբակցության ղեկավար Էդմոն Մարուքյանի համոզմամբ ամեն մարդ իրավունք ունի օգտվել իր խոսքի ազատության իրավունքից՝ այդ թվում նաև կաթողիկոսը։

«Թե՛ հոգևոր ծառայողները, թե՛ աշխարհիկ քաղաքացիներն ունեն կարծիք արտահայտելու իրավունք»,- այդ մասին լրագրողների հետ զրույցում ասաց Մարուքյանը՝ անդրադառնալով կաթողիկոսի՝ Ռոբերտ Քոչարյանի խափանման միջոց կալանքը փոխելու կոչին։

Պատգամավորը նկատում է, որ այդ կոչը պետք չէ սարքել «հայոց հարցը»։

«Կարծիքն հարգողն ո՞վ է՝ դատարանն ու գլխավոր դատախազությունը, բայց տեսնում եմ ֆեյսբուքյան տարբեր գրառումներ, յութուբյան կեղծ ալիքներում պատրաստված տեսանյութեր՝ վեհափառի և եկեղեցու դեմ։ Դա ես դատապարտում եմ, որովհետև վերջին հաշվով մենք մեր արժեքների, 2000-ամյա եկեղեցու դեմ ենք գնում։ Դա որևէ ձևով չի կարող արդարացվել»,- ասաց Մարուքյանը։

Միևնույն ժամանակ նա նշեց, որ անձամբ ինքը համաձայն չէ վեհափառի կարծիքի հետ, բայց եթե անգամ դրա մասին արտահայտվի՝ դա կանի շատ հարգալից։

«Ամեն ինչ իր ձևն ու կարգն ունի։ Խոսքը Ամենայն Հայոց կաթողիկոսի մասին է։ Գիտեք՝ եկեղեցու դեմ շատերն են դուրս եկել, բոլորն էլ փոշիացել են, վերացել։ Վերջին հաշվով, որ վաղը, մյուս օրը մենք էլ դառնանք հանգուցյալներ, գալու են մեր հուղարկավորությունն էլ իրենք կազմակերպել»,-ասաց ԼՀԿ ղեկավարը՝ հարցադրմամբ․ «Եկեղեցու դեմ կարելի՞ է դուրս գալ և նման հայտարարություններ անել, երբ բոլորս մեր երեխաներին կնքում են եկեղեցիներում»։

Մարուքյանը հորդորում է զգույշ լինեն նման հայտարարություններում և կաթողիկոսի հետ անհամաձայնությունը չդարձնել եկեղեցու դեմ ծավալված զզվելի արշավ։

«Կոնկրետ արշավ է սկսվել՝ նաև քաղաքական գործիչների կողմից։ Մարդիկ կարող են սիրել կամ չսիրել Վեհափառին, բայց նա օծված է և Ամենայն Հայոց կաթողիկոսն է»,- ընդգծեց Մարուքյանը։