Կարտոֆիլը տապակելիս սև գույն է ստացել

Երկու օր անընդմեջ newspress.am-ն ահազանգ է ստանում շուկայում հայտնված էժանագին և անորակ կարտոֆիլի վաճառքի մասին: Երևանի բնակիչ Արտակ Կիրակոսյանի ընտանիքն օրերս ձմռան համար կարտոֆիլ է գնել:

«Լավ կարտոֆիլ էր երևում արտաքինից, խոշոր ու գինն էլ շատ հարմար՝ 120 դրամ: Ասեցի միանգամից ձմեռվա համար վերցնեմ: Բերեցինք տուն ու որոշեցինք համն էլ փորձել: Կարտոֆիլը «ժարիտելիս»՝ թավայի մեջ սևացավ: Տենց բան իմ կյանքում չէի տեսել»,- ասաց newspress.am-ի զրուցակիցը:

67 ամյա Անահիտ Կիրակոսյանն էլ վստահեցնում է, որ կարտոֆիլը վարակված է. «Թե չէ ինչ եք կարծում, ինչի պետքա կարտոֆիլը գույնը փոխի: Ինչի էդ վաճառողները չգիտե՞ն, թե ինչ են տալիս մեզ: Հլա մի բան էլ անշնորհքի պես խաբում են, թե Գավառի կարտոֆիլա: Եսիմ էդ ինչ թունաքիմիկատներ են խառնել հետը: Մարդիկ իրենց փողի համար ինչ ասես կանեն: Բա խիղճն ո՞ւր մնաց»,- սրտնեղած ասաց կինը:

Հարկ է նկատել նաև, որ «հիվանդ» կարտոֆիլ վաճառվել է, ոչ միայն մայրաքաղաքում, այլ նաև մի շարք համայնքներում:

ՀՀ գյուղատնտեսության նախարարության կազմի մեջ մտնող սննդամթերքի անվտանգության պետական ծառայության մամուլի քարտուղար Նվարդ Առաքելյանը  newspress.am-ին հայտնեց, որ խնդրին տեղյակ են, սակայն որևէ հստակ հայտարարություն չեն կարող անել, քանի դեռ փաստերը ճշտված չեն:

«Մենք արդեն զբաղվում ենք խնդրով, սակայն առայժմ որևէ հայտարարություն չենք կարող անել: Կարտոֆիլի որակի մասին պաշտոնապես կարող ենք տեղեկություններ տալ միայն ուսումանսիրություններից և լաբորատոր փորձարկումներից հետո»,–նշեց Առաքելյանը: