Արցախում նախագահի և Ազգային ժողովի ընտրություններ են. բացվել են տեղամասերը

Այսօր՝ մարտի 31-ին, Ժամը 08:00-ից Արցախում բացվել է 282 ընտրական տեղամաս, որոնցից մեկը` Հայաստանում:

Հանրապետության նախագահի ընտրություններին մասնակցում է 14 թեկնածու, իսկ Ազգային ժողովի ընտրություններին` 10 կուսակցություն և 2 կուսակցության դաշինքներ:

Մարտի 21-ի դրությամբ դիտորդական առաքելություն իրականացնելու համար ԿԸՀ-ում հավատարմագրվել էին 14 հասարակական կազմակերպություններ` 807 ներկայացուցիչների ընդգրկմամբ, ինչպես նաև 37 զանգվածային լրատվամիջոցների 197 ներկայացուցիչներ:

Արցախի նախագահի պաշտոնի համար առաջադրվել է 14 թեկնածու` Սերգեյ Ամիրյանը, Քրիստին Բալայանը, Էդուարդ Դադայանը, Բելլա Լալայանը, Մասիս Մայիլյանը և Մելսիկ Պողոսյանը ինքնաառաջադրվել են, իսկ կուսակցությունների կողմից առաջադրված թեկնածուներն են՝ Արցախի պահպանողական կուսակցության կողմից ՝ առաջադրված Դավիթ Բաբայանը, առաջադրված «Միացյալ Հայաստան» կուսակցության կողմից Վահան Բադասյանը, «Արդարություն» կուսակցության կողմից առաջադրված Վիտալի Բալասանյանը, ՀՅԴ կողմից առաջադրված Դավիթ Իշխանյանը, «Անկախության սերունդ» կուսակցության կողմից առաջադրված Ռուսլան Իսրայելյանը, «Ազգային վերածնունդ» կուսակցության կողմից առաջադրված Հայկ Խանումյանը, Ժողովրդավարական կուսակցության կողմիցառաջադրված Աշոտ Ղուլյանը և «Ազատ հայրենիք-ՔՄԴ» կուսակցությունների դաշինքի կողմից առաջադրված Արայիկ Հարությունյանը:

Առաջադրված կուսակցությունները և կուսակցությունների դաշինքներն են.

«Ազատ Հայրենիք-ՔՄԴ» կուսակցությունների դաշինք

«ՆՈՐ ԱՐՑԱԽ» կուսակցությունների դաշինք

Արցախի պահպանողական կուսակցություն

«Միասնական հայրենիք» կուսակցություն

«Ազգային վերածնունդ» կուսակցություն

«Հայ հեղափոխական դաշնակցություն» կուսակցություն

Արցախի Ժողովրդավարական կուսակցություն

Արցախի «Արդարություն» կուսակցություն

Արցախի հեղափոխական կուսակցություն

Լեռնային Ղարաբաղի կոմունիստական կուսակցություն

«Անկախության սերունդ» կուսակցություն

«Միացյալ Հայաստան» կուսակցություն