Հեռախոսի միջոցով, քաղաքացիների անձնական տվյալներին և հաղորդակցության գաղտնիությանը միջամտելու մասին նախագիծն առաջին ընթերցմամբ ընդունվեց

ԱԺ-ն առաջին ընթերցմամբ ընդունեց «Արտակարգ դրության իրավական ռեժիմի մասին» ՀՀ օրենքում լրացումներ կատարելու մասին և «Էլեկտրոնային հաղորդակցության մասին» օրենքում լրացումներ կատարելու մասին օրենքների նախագծերը:

Կողմ քվեարկեց 57, դեմ՝ 24, ձեռնպահ՝ 1 պատգամավոր:

Նախագիծը ենթադրում է համաճարակի հետևանքով անձնական տվյալների պաշտպանության, մասնավոր և ընտանեկան կյանքի անձեռնմխելիության, հաղորդակցության ազատության և գաղտնիության իրավունքներին միջամտումը՝ հանրային էլեկտրոնային հաղորդակցության ծառայություններ ստացող հաճախորդների կողմից օգտագործվող ծառայության վայրը պարզելու համար անհրաժեշտ տվյալների հավաքագրման եղանակով։ 

«Իմ քայլը» խմբակցության որոշ պատգամավորներ թեև դեմ էին նախագծին, սակայն խմբակցության ղեկավար Լիլիթ Մակունցը նկատեց, որ խմբակցությունն ունի առաջարկներ, որոնք կներկայացնի առաջինից երկրորդ ընթերցման ընթացքում:

Անկախ պատգամավոր Արման Բաբաջանյանը հայտարարեց, որ դեմ է քվեարկելու։

Նախագծին դեմ քվեարկելու հայտարարությամբ, խմբակցությունների անունից, հանդես էին եկել նաև «Լուսավոր Հայաստան» խմբակցության ղեկավար Էդմոն Մարուքյանը և «Բարգավաճ Հայաստան» խմբակցության պատգամավոր Նաիրա Զոհրաբյանը։

Հիմնավորելով իրենց տեսակետը՝ նրանք հայտարարել էին, որ նախագիծն աննպատակ է և գումարների զուր վատնում։