«Բագրատյան, արա, ժողովրդի մոտ չասես՝ սուտ եմ ասում». Վարդան Այվազյան

Կոտայքի մարզի Չարենցավան քաղաքում  նոյեմբերի 30-ին, «Այո»-ի եւ «Ոչ»-ի ռեալիթի շոուի ընթացքում վեճ է ծագել «Ոչ»-ը ներկայացնող ՀԱԿ խմբակցության պատգամավոր Հրանտ Բագրատյանի եւ ԱԺ ՀՀԿ խմբակցության պատգամավոր Վարդան Այվազյանի միջեւ:

Կրքերն այնքան են թեժացել, որ Բագրատյանը քիչ է մնացել անցներ բռունցքների օգնությանը: Վեճի առիթ է հանդիսացել չարենցավանցի մի երիտասարդի հարցն այն մասին, թե ուր էին «ոչ» ասողները 1995թ. եւ 2005թ Սահմանադրական հանրաքվեների ժամանակ:

Նա նշել է, որ 1995թ.-ի սահմանադրությունը լավագույնն է եղել` «Այդ ժամանակ Չարենցավանի շտաբի գլխավորներից մեկը եղել է հենց Վարդան Այվազյանը», պատասխանել է Բագրատյանը:

Վարդան Այվազյանն ի պատասխանել ասել է, որ ինքն իսկապես շտաբում եղել է. «Ատկազ չեմ կանգնում»:

Բագրատյանը նման բան լսելով սկսել է ավելի բորոբոքվել, նշելով, որ  օրերս ՀՀԿ-ական պատգամավորը հերքել է, որ ինքը հանձնաժողովի անդամ եղել է:

«Պարոն Բագրատյան, Ձեր սուտ արտահայտությունները եթեր են գնալու, եթե ինձ ապացուցեք, որ ինչ-որ մի եթերում ասել եմ, որ ես ատկազ եմ եկել, պատրաստ եմ պաշտոնս էլ, պատգամավորությունս էլ վայր դնել»,- բարկացած արձագանքել է Վարդան Այվազյանը, ինչից հետո հնչել են փոխադարձ վիրավորանքներ  եւ մեղադրական արտահայտություններ:

«Բագրատյան, արա, ժողովրդի մոտ չասես՝ սուտ եմ ասում, սուտը դու ես ասում, չխանգարես էլ ինձ կյանքում»,- խոսքը եզրափակել է Վարդան Այվազյանը:

Նշենք, որ Չարենացավանում այսօր բավականին թեժ է մթնոլորտը: