Ձայնդ կտրի. Թեժ մթնոլորտում Գևորգ Պապոյանն Էդմոն Մարուքյանին հիշեցրեց քաղաքական անցյալը (տեսանյութ)

Էդմոն Մարուքյանն ու «Լուսավոր Հայաստանը» սկսել են քննարկել շրիշակից ցածր մակարդակի այս թեման, հետևաբար ստիպված եմ արձագանքել: Այդ մասին այսօր Ազգային ժողովում ասաց ԱԺ «Իմ քայլը» խմբակցության պատգամավոր Գևորգ Պապոյանը: 

«Էդմոնը Մարուքյան, ըստ երևութին, խիստ սրտնեղելով որոշ անձանց ապօրինի գույքի հնարավոր բռնագանձման հեռանկարից՝ ընկավ հուզական պոռթկման մեջ և ինձ մեղադրեց 18 տարեկանում Հանրապետականին անդամակցելու համար՝ հետն էլ նշելով, որ թե բա՝ կոռուպցիաի հետ կապված հարցերն այն ժամանակ ինչո՞ւ չէիք բարձրացնում: Հատուկ Էդմոն Մարուքյանի և «Լուսավոր Հայաստանի» համար ասեմ, որ չէի կարող բարձրացնել, քանի որ, ի տարբերություն իրենց, որևէ կապ չեմ ունեցել Սերժ Սարգսյանի իշխանության հետ, ավելին՝ ինձ զրկեցին բուհում իմ դասաժամերի մեծ մասից»,- ասաց նա մի շարք օրինակներ բերելով այն մասին, որ ինքը մշտապես աշխատել է մասնավոր սեկտորում և իր ճանապարհն ինքն է հարթել»: 

Նա իր խոսքում անընդհատ դիմում էր Էդմոն Մարուքյանին և հիշեցնում Հանրապետականի իշխանության տարիները, երբ ինքը չէր կարող, իսկ Մարուքյանը կարող էր բարձրաձայնել խնդիրների մասին: Պապոյանը թվարկեց նաև մի քանի անձանց մասին, ովքեր եղել են Մարուքյանի խմբակցությունում, սակայն տարբեր պաշտոններ են զբաղեցրել Սերժ Սարգսյանի և Ռոբերտ Քոչարյանի իշխանության կազմում: 

Պապոյանի խոսքի ընթացքում «Լուսավոր Հայաստան» խմբակցության անդամների կողմից արձագանքներ էին լսվում, ինչին Պապոյանն արձագանքեց՝ խլրտոցներ չլսեմ, ավելի ուշ էլ ավելացրեց՝ ձայնդ կտրի:

Այդ ընթացքում արդեն խառնաշփոթ էր ստեղծվել բոլոր խմբակցությունների մոտ, և ԱԺ փոխնախագահ Վահե Էնֆիաջյանը կոչ արեց Էդմոն Մարուքյանին և նաև «Իմ քայլը» խմբակցությանը պահպանել աշխատանքային մթնոլորտը:

«Հանգստացեք, թուլացեք ու վայելեք»,- իր հերթին՝ ասաց Պապոյանը:

Մանրամասները՝ տեսանյութում