Գործազուրկների գերակշռող մասը կանայք են

Հայաստանում նախորդ տարվա համեմատ աշխատանային ռեսուրսները նվազել են: Այդ մասին այսօր, լրագրողների հետ հանդիպման ժամանակ հայտնեց ԱՎԾ աշխատանքի վիճակագրության բաժնի պետ Լուսինե Քալանթարյանը:

Նրա խոսքով մեր երկրի աշխատաշուկայում առկա խնդիրները արդիական են ամբողջ աշխարհում:

«2015 թվականի երկրորդ եռամսյակի տվյալներով` աշխատանքային ռեսուրսը կազմում է 2,1 միլիոն մարդ,  որը նախորդ եռամսյակի համեմատ նվազել է: Դրանցից աշխատանքային շուկայում ակտիվ մասնակցություն ունեցողները 63 % են կազմում: Դրանք զբաղվածները և գործազուրկները միասին են, ովքեր աշխատանք են փնտրում: Մնացած 37 տոկոսն աշխատանք չունի և չի էլ փնտրում: Նրանց գերակշիռ մասը ուսանողներն են և տնային տնտեսություն վարողները, նաև կենսաթոշակային տարիքում գտնվողները: 242 հազար մարդ այսօր գործազուրկ է»,-ասաց Լուսինե Քալանթարյանը:
Նրա խոսքով`նախորդ տարիների համեմատ, այժմ ավելի շատ աշխատանք փնտրելու համար նախ և առաջ դիմում են գործատուին, հետո նոր՝ ծանոթ-բարեկամին:
«Նախորդ եռամսյակի համեմատ զբաղվածության դաշտում կա 2 տոկոս կրճատում, նախորդ տարվա երկրորդ եռամսյակի համեմատ՝ 8,5 տոկոս»:
Գործազուրկների 52 տոկոսը կազմում են կանայք, 48-ը՝ տղամարդիկ: