Մի շնաբարո դուսպրծուկ իր Ֆեյսբուքի էջին սուտ լուր է դրել․ Մարուքյանը հերքեց (տեսանյութ)

«Լուսավոր Հայաստան» կուսակցության ղեկավար Էդմոն Մարուքյանը հերթական անգամ հերքել է տարածվող ոչ հավաստի լուրերն իր և իր ղեկավարած կուսակցության մասին։

Նա ֆեյսբուքյան ուղերձով խոսել է տարածված 3 ստերի մասին:

«Մի շնաբարո դուսպրծուկ իր Ֆեյսբուքի էջին գրել է, որ իբր ես ստորագրել եմ ՀՀ երկրորդ նախագահ Ռոբերտ Քոչարյանին ազատ արձակելու համար։ Սուտ է, ես նման բան չեմ ստորագրել, չէի կարող ստորագրել»,- ասաց Մարուքյանը՝ հավելելով, որ այդ մասին լուրը ինքն արդեն հերքել է, բայց այն նորից տարածվել է։

«Երկրորդ սուտը՝ գրում են, որ մենք և ՀՅԴ-ն աջակցում ենք «ոչ»-ի շտաբին: Մենք հայտարարել ենք, որ ընդհանրապես չենք մասնակցելու քարոզչության գործընթացին և հետ ենք քաշվել:

Մեզ հետ կապվում են հազարավոր քաղաքացիներ, ասում են՝ խնդրում ենք, ընտրական հանձնաժողովներում ձեր տեղերը տվեք մեզ, գնանք էդ մի օրն աշխատենք, էդ 66 հազար դրամն ստանանք, հացի փող չունենք: Մենք ասում ենք, որ մենք տեղեր չունենք հանձնաժողովներում, որովհետև պաշտոնապես գրանցված «ոչ»-ի թիմը միայն կարող է հանձնաժողովում տեղեր նշանակել: Մենք նաև ասում ենք, որ հնարավորություն կա, մենք դեմ չենք, որ դուք գնաք և հանձնաժողովներում աշխատեք, դա քարոզչություն չի, մեկ օրվա աշխատանք է: Հանձնաժողովի անդամն օրենքով սահմանված կարգով ուղղակի քվեարկության ժամանակ օրենքն է իրացնում: Ասել ենք՝ դեմ չենք, որ մեր անդամները գնան և աշխատեն: Խոսքն այն մարդկանց մասին է, որոնք լիցենզիա են ստացել ԼՀԿ-ի կողմից: Եթե մենք դեմ էլ լինենք, իրենք կարող են գնալ ու աշխատել:

Դրանից հետո լուր է տարածվում, որ մենք աջակցում ենք «ոչ»-ի շտաբին, որովհետև «ոչ»-ի քարոզչություն Հայաստանում չկա:

Այդ մարդիկ ընդամենը հետևելու են արդարությանը, և իշխանական ճամբարից խառնվել են իրար: Իմ մոտ տպավորություն է, որ մարդիկ վախենում են, որ հանձնաժողովում գրագետ մարդիկ են ներգրավվում։ Կարո՞ղ է ուզում եք հանրաքվեն կեղծել, դրա համար եք խառնվել իրար։ Չգիտեմ, չեմ ուզում ես խառնվել այն ամենի մեջ, բայց իմացեք, որ դա էլ է սուտ»,- հայտարարել է Մարուքյանը:

Երրորդ սուտը Մարուքյանի ներկայացմամբ այն է, որ Նիկոլ Փաշինյանին մտերիմ մի անձնավորություն, որ «Ելք» դաշինքի ժամանակ իրենց հետ շփվել է, իրար ճանաչում են, ֆեյսբուքի իր էջում տարածել է նյութեր, որ Դավիթ Խաժակյանը հանդիպել է «Ադեկվադների» հետ: Մարուքյանը հիշեցրեց, որ տարածված լուսանկարը երկու տարվա վաղեմություն ունի և արվել է այն ժամանակ, երբ Խաժակյանն ու «Ադեկվադի» անդամները հաղորդման հյուր են եղել։

«Ժողովուրդ, այլանդակ հակաքարոզչություն է տեղի ունենում: Ես տեսնում եմ, որ այսօր անբարոյականությունը սահմաններ չունի։ Ցանկացած բան, ցանկացած մարդու մասին կարելի է ասել, տեսանյութ պատրաստել»,- ասաց նա և հավելեց, որ նման դեպքերում, սակայն, դատի տալն անիմաստ է, քանի որ շատ նյութեր անհեղինակ են։

«Երբ իշխանությունը լացում է, թե մեդիաներն իրենց չեն պատկանում, իմացեք, որ այսօր մեդիատիրույթում ամենահզորը գործող իշխանությունն է։ Այսօր գործող իշխանության դեմ այս առումով խաղ չկա։

Եթե Նիկոլ Փաշինյանը տեսնելով, որ թիմակիցը երկու տարի առաջվա նկար է տարածքում և չի ասում՝ եղբայր, դա սուտ է, մի արա, էս մեր տեսակը չի, ինքը դառնում է այդ ամենի թիվ մեկ պատասխանատուն: Հետեւեք ձեր մարդկանց, թույլ մի տվեք, որ բարոյականության բոլոր սահմանները մարդիկ հատեն»,-ասաց Մարուքյանը: