50 եվրոյով Հռոմ գնալը աշխարհընկալումը փոխելու և լավը տեսնելու հնարավորություն է. Ատոմ Ջանջուղազյան

Մենք ամենևին հակված չենք կատեգորիկ հայտարարել, թե այն, ինչ ունենք, կատարյալ է և ոչ մի բան պետք չի փոխել: Այս մասին այսօր՝ փետրվարի 21-ին, ԱԺ-ում լրագրողների հետ զրույցում նշեց Ֆինանսների նախարար Ատոմ Ջանջուղազյանը, ով մասնակցում էր «Պետական գնումների համակարգի հիմնախնդիրները և դրանց լուծման ուղիները» խորագրով խորհրդարանական լսումներին։ 

«Փորձում ենք ձեռքներս պուլսի վրա պահել, որպեսզի համարժեքորեն արձագանքենք այն ազդակներին, որ ստանում ենք միջավայրից և, ըստ դրա, լավագույնը դարձնենք մեր գնումների համակարգի կարգավորումները»,- ասաց նախարարը:

Ատոմ Ջանջուղազյանի խոսքով՝ նախարարությունը շրջանառության մեջ է դրել մի նախագիծ, որի վերաբերյալ ստացել է առաջարկներ թե՛ հանրային սեկտորի ներկայացուցիչներից, թե՛ պետական կառավարման մարմիններից, թե՛ հասարակական կազմակերպություններից:

Ջանջուղազյանն արձագանքեց նաև դիտարկմանը, թե վարչապետ Նիկոլ Փաշինյանը տնտեսական առաջընթաց է համարում այն, որ մարդիկ կարողանում են 50 եվրոյով մեկնել Հռոմ։ Ըստ նրա՝ օրինաչափ է, որ մարդիկ տարբեր տեսակետներ են հայտնում։

«Հիմա եթե հարցն այն է, թե արդյոք 50 եվրոյով Հռոմ գնալը հնարավորությո՞ւն է, թե՞ ոչ, ապա միանշանակ հնարավորություն է: Արդյոք դա հնարավորություն է փոխել նաև ինչ-որ տեղ աշխարհընկալումը, աշխարհայացքը, արժեքային համակարգի վերաբերյալ մտորումներ ունենալ, վերցնել այն, ինչը լավն է, տեսնել այլ ստանդարտներ, որոնցով մարդիկ ապրում են և ձգտել դրան, թե՞ ոչ․ համոզված եմ, որ հնարավորություն է»։