Հանուն ինչի՞ է վերադառնում Վանեցյանը

Ազգային անվտանգության ծառայության նախկին տնօրեն Արթուր Վանեցյանը տևական լռությունից հետո այսօր հայտարարեց իր վերադարձի մասին։ Այսօր նա հանդիպել է հայաստանյան մի շարք լրատվամիջոցների գլխավոր խմբագիրների հետ և ինչպես տեղեկանում ենք նրա Instagram-յան էջից, այդ հանդիպումները պարբերական բնույթ են կրելու։

Այսօր հայտնի դարձավ նաև, որ Արթուր Վանեցյանն ունի մամուլի խոսնակ. ոլորտի երկարամյա լրագրող, հեռուստահաղորդավար Քրիստինե Մելքոնյանն է ստանձնել այդ պատասխանատվությունը։

Արթուր Վանեցյանի՝ քաղաքականություն մտնելու մեկնարկն այսպիսով կարելի է համարել բացված։ Հետաքրքրական է, որ Վանեցյանը հենց այս փուլում որոշեց բացել խաղաքարտերն ու ցույց տալ իր երբեմնի թիմակիցներին, որ դառնալու է նրանց քաղաքական հակառակորդը քաղաքական արենայում ու հաշվի առնելով Վանեցյանի՝ նախկինում զբաղեցրած պաշտոնն ու հանրության շրջանում ձեռք բերած բավականին բարձր վարկանիշը, Փաշինյանի իշխանության համար Վանեցյանը կարող է դառնալ լրջագույն խնդիր՝ զինված ահռելի տեղեկատվությամբ ու փորձով։

Վանեցյանը մտնում է քաղաքականություն այս փուլում, ենթադրելի է, որ փորձի կանխել սահմանադրական կարգի տապալումը, որի համար հող է նախապատրաստել Ազգային ժողովի «Իմ քայլը» խմբակցության պատգամավոր Վահագն Հովակիմյանն ու նրա անօրինական նախագիծը փոփոխությունների ենթարկած թվով 37 պատգամավոր։

Կկարողանա՞ արդյոք Փաշինյանի երբեմնի թիմակիցը հավատարիմ մնալ Ազգային անվտանգության ծառայողին տրված երդմանն ու պաշտպանել պետության անվտանգությունը ներքին սրացումներից, սահմանադրական կարգի տաալումից ու վհուկների որսից, ցույց կտա ժամանակը, սակայն ակնհայտ է, որ Արթուր Վանեցյանն իր թիմով գալիս է միանալու այն նորաստեղծ կուսակցությունների գաղափարական պայքարին, որոնց նպատակն է համախմբումը՝ հանուն պետականության պահպանման և ոչ թե ինչպես Փաշինյանի ու նրա թիմի պարագայում էր՝ հանուն իշխանափոխության ու աղքատության հաղթահարման։

NewsPress.am