Վանեցյանը չցանկացավ մասնակցել այս «կլոունադային». Բաբկեն Հարությունյան (տեսանյութ)

Ոչ մեկի համար այլևս գաղտնիք չէ, որ մեր վարչապետն ադեկվատ չէ. ես ցավով եմ ասում, որ մեր վարչապետը կտրվել է իրականությունից: Այս մասին լրագրողների հետ հանդիպման ժամանակ ասաց «Հանրային վերահսկողության կենտրոն» ՀԿ նախագահ Բաբկեն Հարությունյանը:

Նա վկայակոչում է այն երևույթները, իրավիճակներն ու խնդիրները, որոնց Նիկոլ Փաշինյանը դեմ է եղել մինչև իշխանության գլուխ անցնելը, ու հիմա այդ հարցերում հետ է կանգնել իր նախկին դիրքորոշումներից:

Անդրադառնալով գրիչի պատմությանն ու Սահմանադրական դատարանի նախագահի ու նրա ընտանիքի շուրջ տեղի ունեցող իրադարձություններին, Բաբկեն Հարությունյանը նկատեց, որ երկիրը վերածվել է «կլոունադայի»:

«Էս ծեփել-փռելու, կամ Նիկոլի բառով ասած` պառկացնելու, քաղաքականությունը ոչ մի լավ տեղ մեզ չի տանելու»,- ասում է Հարությունյանը: Նա նկատում է նաև, որ ամենևին էլ պատահական չէր, որ երբ օրերս քաղակտիվիստներին բերման էին ենթարկում` պառկեցնում էին գետնին, նկարում ու այդ տեսանյութն ուղարկում Նիկոլին: Բանախոսի որակմամբ` սա նորմալ, ադեկվատ մարդու պահվածք չէ:

«Ես ցավ եմ ապրում, որ մեր երկիրը նման ղեկավար ունի, սա խարան է երկրի համար»,-նշում է Հարությունյանը:

Անդրադառնալով ուժային կառույցների խնդրին` Բաբկեն Հարությունյանը նկատեց, որ չի կարծում, թե ԱԱԾ նախկին ղեկավար Արթուր Վանեցյանին և նախկին ոստիկանապետ Վալերիյ Օսիպյանին ազատել են աշխատանքից: 

«Մարդիկ իրենք են հեռացել աշխատանքից»,- ասաց նա: Բանախոսի դիտարկմամբ՝ մասնավորապես Վանեցյանի դեպքում ունենք լավ օրինակ` նա ոչ միայն հրաժարական տվեց, այլև կանգ առնելու հրահանգ տվեց:

«Այսինքն՝ մարդը հասկացել էր` ինչ է կատարվում երկրում և չուզեց մասնակից լինել այս ռեպրեսիվ գործողություններին, չուզեց դառնալ մի կառույցի ղեկավար, այն էլ անվտանգության կառույցի, որին երկրի վարչապետը կառավարության նիստի ժամանակ կարող է հանձնարաարական տալ` սատանայի հետ կապեր պարզելու մասին. սա խեղկատակություն է երկրի ղեկավարի կողմից: Բնականաբար, մարդը չի ուզել և հայտարարել է, որ պայքարելու է»,- նշեց Բաբկեն Հարությունյանը` հավելելով, որ իրեն հարգող որևէ պաշտոնյա չպետք է լինի վերադասի կամակատարը, իսկ Վանեցյանի դեպքում, Բաբկեն Հարությունյանի խոսքով, տեսանք, որ նա չի ուզում կամակատար լինել:

«Նա չուզեց անհիմն բերման ենթարկել ակտիվիստներին` գետնին պառկեցնելով, և առանց ձեռնաշղթաների ու կառավարական ոստիկանություն տեղափոխել  շենք գրաված ու պատանդ վերցրած զինված հանցագործին, ինչպես դա արեց ոստիկանապետը: Էս մարդը չուզեց մասնակցել էդ կլոունադային, ավելին` կանգառի կոչ արեց»,-նշեց Բաբկեն Հարությունյանը:

Մանրասմասները` տեսանյութում