Պարոն ժ/պ, Փաշինյանի քննությունը ստացաք, բայց ուսադիրը կարող եք աղբամանը նետել. Արիանա Հովսեփյանը՝ Արման Սարգսյանին

Այսօր համացանցը հերթական անգամ ցնցվում է. հայտնի է դառնում, որ Երևանի կենտրոնում՝ հենց Հանրապետության հրապարակում գտնվող «Էրեբունի պլազա»-ի շենք է մտնում անհայտ անձն ու կրակոցներ արձակում: Այստեղ մի րոպե կանգ առնենք ու կարմիր քարտ ցույց տանք շենքի անվտանգության պատասխանատուներին ու շարունակենք: 

Մամուլ կիսատ-պռատ տեղեկություններ են սպրդում, որ զինված հարձակում գործած անձը նախ մտել է շենք, կրակոցներ արձակել ու հարցրել Քոչարյանի գրասենյակի տեղը:

Արդեն տարօրինակ է: 

Ակտիվիստ Նարեկ Սամսոնյանը ֆեյսբուքյան գրառմամբ տեղեկացնում է, որ հարձակում գործած անձը Նիկոլ Փաշինյանի համակիրն է և գրում, որ սպասելու է ոստիկանության հետագա գործողություններին Փաշինյանի համակրի հետ կապված: Ի դեպ, Փաշինյանի մասին. նա, փորձելով խուսափել հերթական լռությունից ծնված աղմուկից, 1-2 տող ձոնեց կատարվածին, բայց նույնիսկ բառացիորեն խուսափեց գրելուց, որ խոսքը հենց «Էրեբունի պլազա»-ում հնչած կրակոցների մասին է: 

Իսկ ոստիկանության գործողությունները ցնցող էին. շենքում, ուր, ի թիվս այլ գրասենյակների, գործում է նաև մանկապարտեզ, կրակոցներ արձակած տղամարդուն, դասականի ասած, շնորհքով ուղեկցում են դեպի ոստիկանապետին սպասարկող մեքենան, առանց ձեռնաշղթաների և բոնուս... ոստիկանապետի ժ/պ-ն էլ նստում է նույն մեքենան, որպեսզի համակիրն անվտանգ լինի: 

Հիմա հարց, պարոն ժ/պ, քննությո՞ւն էինք հանձնում Նիկոլ Փաշինյանին: Վստահ եղեք, ստացաք: Իսկ երբ այսօր կգնաք տուն, Ձեր գլուխը կդնեք բարձին, կմտածեք՝ ինչպե՞ս կվարվեիք մի մարդու հետ, ով, ասենք, կլիներ Սերժ Սարգսյանի համակիրը, կամ Ռոբերտ Քոչարյանի, կմտներ «Քաղաքացիական պայմանագրի» գրասենյակ ու անկանոն կրակոցներ կարձակեր: Կնստեցնեի՞ք Ձեր ծառայողական մեքենան, առանց ձեռնաշղթաների ու ջերմ կզրուցեի՞ք նրա հետ: Չէ, պարոն Սարգսյան:  Կվախենայի՛ք նույնը անելուց, որովհետև սա վախվորածների իշխանություն է: Բայց մի՛ մոռացեք, որ Ձերն ուսադիր է, որն այսօրվանից կարող եք աղբամանը նետել: 

Ինչևէ: Այլևս չենք զարմանա, եթե անկանոն կրակոցներ արձակողին ազատ արձակեն, քանի որ ոչ ոք չի տուժել, չի մահացել, միգուցե պարզվի՝ զենքն էլ օրինական է, ասենք, որսորդական...

Հիմա մի երկրորդ անգամ կանգ առնենք ու հիշենք, օրինակ, թե ինչպես ԵՊՀ ուսխորհրդի նախագահին կարմիր բերետավորները բերման ենթարկեցին, ու միայն Աստված գիտեր, թե ինչու վերջին վտանգավոր հանցագործի պես: 

Հիշենք նաև, թե ինչպիսի մասկի-շոու էր Քոչարյանի աջակից Նարեկ Մութաֆյանին և Սարգիս Օհանջանյանին ձերբակալելու ժամանակ: Հիշեցնենք՝ նրանք ընդամենը նկարահանել էին դատավորին: Նկարահանել: Բայց նրանց հետ ոչ բանակցեցին, ոչ էլ ոստիկանապետն ուղեկցեց...

Ասածս ինչ է, պարոնայք իշխանավորներ, հասկանալի է, որ համակիրների բանակն օր օրի նվազում է ու նրանցից յուրաքանչյուրին պահելն էլ աթոռի ու մահու հարց է, բայց շեֆերի ու նրանց մանկլավիկների առաջ այդքան խոր մի ծռվեք: 

Արիանա Հովսեփյան 
NEWSPRESS.am-ի հիմնադիր տնօրեն