Ե՞րբ մոլուցքդ մեջդ մեռցրեց մարդուն

Արդեն մի քանի օր է ազգը սգում է. սգում է ու քննարկում մի հարց՝ ինչո՞ւ, ո՞վ, ի՞նչի համար։

Ողջ համացանցն ու հեռուստադաշտը լի է վերլուծություններով, տարատեսակ գնահատականներով, ափսոսանքի խոսքերով։ Բոլորին հուզում է սեփական տան պատերին 35 կրակոց արձակած նախկին բարձրաստիճան պաշտոնյայի մահը, հուզում է բոլորին՝ բացի մեկից՝ երկրի ղեկավար Նիկոլ Փաշինյանից։

Մի կողմ թողնենք այն, որ վարչապետ Փաշինյանի արարողակագը տապալված է այն աստիճան, որ դրանից բան չհասկացող մարդու համար է անգամ տեսանելի դրա բացակայությունը։ Մի կողմ թողնենք նաև նրա արարողակարգի խայտառակությունը տոնական օրերին։ Մի կողմ թողնենք խայտառակված նախկին խոսնակին, ով վճարեց իր տապալման գինն ու հեռացավ Փաշինյանի կողքից։

Մի կողմ թողնենք այս ամենն ու դառնանք հարցին. լա՛վ, մի՞թե իշխանությունն ու ամեն գնով դա պահելու մոլուցքը Փաշինյանի մեջ մեռցրել է մարդուն՝ կարեկից մարդուն, երիտասարդ որդուն հողը դնող հորը ցավակցելու ունակ մարդուն։

Մի՞թե Փաշինյանի մեջ մարդը մեռել է այն աստիճան, որ լրատվականներն են Կառավարություն հարցում ուղարկում ու փորձում պարզել՝ կառավարության ղեկավարը ցավակցո՞ւմ է, թե՞ ոչ։

Մի՞թե Փաշինյանի մեջ մարդը մեռել է այն աստիճան, որ նա սեփական դստեր ստատուսներն ու իր հասցեին հնչող քննադատությունները պատաստ է ֆեյսբուքյան լայվով երկար քննարկել, իսկ Ազգային անվտանգության ծառայության նախկին տնօրենի ողբերգական մահը՝ ոչ։

Փաստորեն, պարզ, մարդկային, անկեղծ ցավակցության Փաշինյանն ունակ չէ, ինչպես նաև ունակ չէ՝ դիակապտությամբ զբաղվող սեփական բուծած խորհրդականներին, Հանրային խորհուրդն ապականողներին, զսպել։

Ու այս ընդհանուր չունակության մեջ այլևս զարմանալի չէ Ալեն Սիմոնյանի հեգնանքն ուղղված Կուտոյանի մահը սգացողին, ում ցավն ակնհայտ էր անգամ դա տեսնել չցանկացողների համար։ Հետաքիքիր է, տեսնես Փաշինյանն այդպես սգալ գիտի՞, թե՞ նա կարող է դա միայն ձևացնել: 

Փաշինյանը նախընտրեց պասիվ հանդիսատեսի դերը, քանի որ իրապես սգացողների կողքին կեղծն ակնհայտ էր լինելու: Նման հանդիսատեսի դեր երբեմն ստանձնում են նաև ակտիվ շահառուները։

Ինչևէ՝ Կոտոյանի մահը մտածելու լուրջ առիթ է ցավակցելու ունակություն չունեցողների համար, որովհետև սա փաստում է, որ ուժային կառույցներն իրենց տեղում չեն, կամ Փաշինյանի պես ունակ չեն իրենց տեղում լինել, ինչը լի է վտանգներով։

Եվ վերջում, որպես հետգրություն... ինչո՞ւ Գեորգի Կուտոյանի մահվան առնչությամբ հարուցվեց քրեական գործ ոչ թե Ազգային անվտանգության ծառայությունում, կամ Հատուկ քննչական ծառայությունում, այլ՝ Քննչական կոմիտեում...

Հանգամանք, որ պետք է հետաքրքրի սևերին ու սպիտակներին:

NewsPress.am