Փաշինյանը, սուպերվարչապետական համակարգ ասելով, նկատի ուներ ստիպողաբար ՏԻՄ իշխանության ձևավորումը. Մակունցը մեկնաբանում է՝ ինչպես հասկանում է

Ազգային ժողովի «Իմ քայլը» խմբակցությունը դեռևս որոշում չունի, թե ում են ներկայացնելու սահմանադրական փոփոխությունների հանձնաժողովում, բայց խմբակացությունն ունի մի շարք դիրքորոշումներ, որոնք կներկայացվեն, երբ փաթեթը պատրաստ կլինի։

Այս մասին լրագրողների հետ զրույցում ասաց խմբակցության ղեկավար Լիլիթ Մակունցը։ Հարցին, թե արդյո՞ք ներկայացված փաթեթում կընդգրկվի նաև «սուպերվարչապետական» համակարգի հարցը, որի մասին խոսել է Նիկոլ Փաշինյանը՝ իր ընդդիմադիր ժամանակ, Մակունցը պատասխանեց․

«Նիկոլ Փաշինյանը սուպերվարչապետական համակարգ ասելով՝ նկատի ուներ, օրինակ, կեղծված ընտրությունների արդյունքում պարտադիր կերպով, ստիպողաբար ՏԻՄ իշխանության ձևավորումը, մենք այսօր նման բան չունենք»,- ասաց նա:

Լրագրողների դիտարկմանը, թե Փաշինյանը խոսել է հենց վարչապետին տրվող լիազորությունների մասին, Մակունցն արձագանքեց, որ մեկնաբանում է այնպես, ինչպես ընկալում է վարչապետի ասածը։

«Նախկինում ունեցել ենք ընդդիմություն, որը լիազորություններով բավականաչափ սահմանափակ էր և չի հիշում, որ ընդդիմությունը ՀՀ նորանկախ պատմության մեջ լինի այնքան ուժեղ, որքան այսօր է: Ամեն օր փորձում ենք բալանսավորել ընդդիմության և իշխանության ուժերը»,- ասաց նա: