Սարսափելի բան է տեղի ունեցել․ բոլորը պետք է զսպավածություն ցուցաբերեն․ Մակունցը՝ Կուտոյանի մահվան մասին

Ազգային ժողովի «Իմ քայլը» խմբակցության ղեկավար Լիլիթ Մակունցը, իր իսկ խոսքով, խրոնոլոգիային չի հետևում, բայց գիտի, որ վարչապետ Նիկոլ Փաշինյանը ցավակցել է ԱԱԾ նախկին տնօրեն Գեորգի Կուտոյանի հարազատներին։ Այս մասին Մակունցն ասաց լրագրողների հետ զրույցում՝ արձագանքելով դիտարկմանը, որ Փաշինյանը չի մասնակցել Կուտոյանի հոգեհանգստին, իսկ ցավակցական ուղերձն էլ հղվել է աշխատակազմի անունից։ 

«Սարսափելի բան է տեղի ունեցել, որից ազդվել ենք բոլորս, իսկ այն, որ այս կամ այն անձինք, այդ թվում՝ վարչապետը, չեն մասնակցել Գեորգի Կուտոյանի հոգեհանգստին, չեմ կարծում, որ տեղին շահարկման առարկա դառնա։ Չեմ կարծում, որ դա էական է, փաստն այն է, որ վարչապետը ցավակցական խոսք հղել է Կուտոյանների ընտանիքին, և իշխանության առանձին ներկայացուցիչներ ներկա են գտնվել հրաժեշտի արարողությանը»,- ասաց Լիլիթ Մակունցը:

Ինչ վերաբերում է հասարակության արձագանքներին և այն աստիճան ատելությանը, որ օգտատերերը գրում են, թե հաջորդը թող ՍԴ նախագահ Հրայր Թովմասյանը լինի, Լիլիթ Մակունցը նկատեց, որ իր համար ցանկացած նման մեկնաբանություն ընդունելի լինել չի կարող։

«Կարծում եմ՝ բոլորը պետք է զսպավածություն ցուցաբերեն ոչ միայն այս դեպքի առումով, այլև՝ առհասարակ: Յուրաքանչյուրս ունենք մեր պատասխանատվության մասնաբաժինը, որպեսզի լինի այնպիսի մթնոլորտ, որտեղ կարևոր լինի աշխատանքային բովանդակությունը, ոչ թե վիրավորանքները, ողջամտության սահմաններից դուրս մեկնաբանությունները»,- ասաց նա: