Սիրիայում ցամաքային գործողություններ իրականացնելու հետևանքով Ռուսաստանը կորուստներ է ունեցել. Der Spiegel

Սիրիայի նախագահ Բաշար Ասադի ռեժիմին Ռուսաստանի օդատիեզերական ուժերից բացի՝ աջակցում են նաև ռուսական ցամաքային զորքերն ու հրետանին։ Այս մասին հայտնել է Der Spiegel-ը։

Նրա տվյալներով` Սիրիայում մարտական գործողություններին մասնակցության հետևանքով զոհվել է առնվազն 2 ռուս զինվոր։

Պարբերականը նաև հաստատում է, որ սիրիական հակամարտությանը մասնակցող ՌԴ Գլխավոր հետախուզական վարչության հատուկ նշանակության 22-րդ բրիգադի 2 մարտիկները հուղարկավորվել են նոյեմբերի 12-ին, Դոնի Ռոստովում, իսկ ռուսական լրատվամիջոցները տեղի ունեցածի մասին անգամ մեկ բառով չեն հիշատակել:

Der Spiegel-ը գրում է, որ ավիահարվածներից բացի՝ ռուսական կողմը զբաղվում է սիրիացի զինվորներին «Իլ» ինքնաթիռներով ու «Մի-24» ուղղաթիռներով տեղափոխելով։

Նշենք, որ Ռուսաստանը հերքում է ռուս զինվորների մասնակցությունը Սիրիայում ցամաքային գործողություններին։