Տնտեսական հեղափոխությունը միֆ է․ գործ ունենք «պրեմիա շոու» ներկայացման ու չիրականացված խոստումների հետ․ Շարմազանով (տեսանյութ)

Չիրականացված խոստումներ, աբսուրդային հայտարարություններ և պետական ինստիտուտների վրա հարձակումներ, այս 3 թեմայի շուրջ խոսեց ՀՀԿ մամուլի խոսնակ Էդուարդ Շարմազանովը՝ լրագրողների հետ հանդիպման ժամանակ։

Անդրադառնալով չիրականացված խոստումներին՝ Շարմազանովն ընդգծեց, որ ոչ միայն չկա ներգաղթ, ինչպես խոստացել էր Փաշինյանը, այլև ըստ պաշտոնական տվյալների, շուրջ 12 հազար մարդով պակասել է ՀՀ բնակչության թիվը:

Չկան նաև խոստացված ներդրումները․ ավելին՝ շուրջ 60 մլն դոլարով էլ ներդրումներն են կրճատվել:

Իսկ տնտեսական լուրջ հեղափոխության մասին էլ արդեն ավելորդ է խոսելը։

«Երբ ՀՀԿ-ն թողել է իշխանությունը, մենք ունեցել ենք պաշտոնական տվյալներով, երկնիշ տնտեսական աճ՝ 10,5 տոկոս: Այսօրվա բյուջեում դրված է 4,9 տոկոս աճ: Եթե անգամ լինի 7 տոկոս, ինչպես իրենք են կանխատեսում, ապա դարձյալ որևէ թռիչքաձև զարգացման մասին խոսք լինել չի կարող։ Այնպես որ՝ տնտեսական հեղափոխությունը միֆ է»,- ասաց Շարմազանովը։

Նա նկատում է, որ թռիչքաձև զարգացումները տարածվել են միայն նախարարների աշխատավարձերի ու պրեմիաների վրա։

«Նախ Փաշինյանի հայտարարում էր, թե ՀՀ-ում կա 3 մլն վարչապետ, այդ 3 մլն վարչապետերից թաքուն բարձրացնում է նախարարների աշխատավարձը: Երկրորդ, մենք գործ ունենք «պրեմիա շոու» ներկայացման հետ: Մենք ականատես եղանք տարբեր գերատեսչություններում պրեմիաների շքերթի»,- ասաց Շարմազանովը՝ հավելելով, թե սրանք են այս իշխանության ձեռքբերումները։

Մանրամասները՝ տեսանյութում