Մտածում էի, թե ոչնչից այլևս չեմ զարմանա․ Ռուբեն Հայրապետյան

Տնտեսագիտական համալսարանի նախկին ռեկտոր Ռուբեն Հայրապետյանը ֆեյսբուքի իր էջում գրել է․

«Շնորհակալություն եմ հայտնում պարոն Ռուբեն Վարդանյանին հրավերն ընդունելու, ինչպես նաև համալսարանում կատարածս փոփոխությունները բարձր գնահատելու համար:

Մտածում էի, թե ոչնչից այլևս չեմ զարմանա, բայց նույնիսկ այն հորինված և տապալված քրեական գործից հետո չէի սպասում, որ այդքան «PR»-վելուց և իրադարձության լուրն ամբողջ կազմով հպարտորեն տարածելուց հետո համալսարանի պաշտոնական լրատվությունը ոչ միայն կշրջանցի պարոն Վարդանյանի այս խոսքն իմ մասին, այլև նյութում «հրաշքով» կբացակայի հարցուպատասխանի ընթացքում ելույթ ունեցած 4 մասնակիցներից միայն այն մասնակցի նկարը, ում հրավերով պարոն Վարդանյանն առաջին անգամ այցելել էր ՀՊՏՀ:

Նկարվելու մեծ սիրահար չեմ, սակայն ապշելու մակարդակի քայլ է...»։
Ինչպես նախորդ բոլոր դեպքերում էր, հակառակ էֆեկտն է ունենալու:
Երբ մեր թիմի կատարած աշխատանքը և ծրագրերն ակտիվորեն հանրայնացվում էին՝ այդ ընթացքում նույնիսկ մեկ անգամ չհիշատակելով մեր ներդրումը, մեղմ ժպիտով էի ընդունում՝ հուսալով, որ գոնե արդյունքները չեն խեղաթյուրվի։ Սակայն այսպիսի արարքները մեղմը դարձնում են լայն:

Ինչևէ...

Ռուբեն Վարդանյանի ելույթը, ինչպես միշտ, անկրկնելի էր՝ միայն իրեն բնորոշ խորքայնությամբ: Այդ մարդու միտքն ակնհայտորեն առաջ է ժամանակից: Այն, ինչ շատերը չեն տեսնում և անգամ չեն պատկերացնում, իր համար արդեն մշակված երկարաժամկետ ծրագիր է՝ հստակ և հաջորդական քայլերով։ Հատկապես այս առումով շատ բան ունենք սովորելու մեր հզոր հայրենակցից:
Սիրելի’ ուսանողներ,
քանի որ ձեզանից շատերը չհասցրին մասնակցել քննարկմանը, առաջիկայում կկազմակերպվի ևս մեկ հանդիպում պարոն Վարդանյանի հետ. չենք մոռանում ընթերցել (վերընթերցել) գիրքը՝ քննարկմանն ավելի պատրաստ ներկայանալու համար»։