ԼՀԿ-ն ավելի քան գոհ է Խաժակյանի աշխատանքից, բայց նրա բովանդակային քննադատությունը լսելի չէ. Մարուքյան (տեսանյութ)

Դավիթ Խաժակյանը շարունակում է մնալ Երևանի ավագանու կազմում՝ որպես «Լույս» խմբակցության ղեկավար և քաղաքապետ Հայկ Մարությանին ուղղված նրա քննադատությունները որևէ կերպ չեն կարող առիթ դառնալ՝ Խաժակյանին հետ կանչելու համար:

Այդ մասին լրագրողների հետ հանդիպմանն ասաց «Լուսավոր Հայաստան» կուսակցության նախագահ Էդմոն Մարուքյանը՝ անդրադառնալով խոսակցություններին, թե կուսակցությունն ուզում է հետ կանչել Խաժակյանին՝ քաղաքապետին ուղղված նրա քննադատությունների ու, մասնավորապես, երեկ՝ դեկտեմբերի 16-ին, ավագանու նիստի ժամանակ նրա ելույթի համար:

Էդմոն Մարուքյանը հայտարարեց, որ կուսակցությունը ավելի քան գոհ է Խաժակյանի աշխատանքից:

«Նման բան չի կարող լինել: Դավիթ Խաժակյանն իր գործունեությամբ ցույց է տվել, թե ինչպիսին պետք է աշխատի ընդդիմադիր ավագանին: Դավիթ Խաժակյանը կարևոր օրինակ է այն երիտասարդների համար, ովքեր ուզում են զբաղվել քաղաքականությամբ»,- ասաց Մարուքյանը:

Միևնույն ժամանակ, նա նկատում է, որ լինում են իրավիճակներ, որոնք Դավիթ Խաժակյանի վերահսկողությունից դուրս են, բայց նա պատասխանատվություն է կրում, որպես խմբակցության ղեկավար: Ավելին՝ դրանք վերագրվում են նաև «Լուսավոր Հայաստան»-ին: Մարուքյանի պնդմամբ՝ հենց միայն նման իրավիճակները կարող են առիթ հանդիսանալ ավագանու կազմում ԼՀԿ-ի մասնակցության նպատակահարմարությունը կասկածի տակ դնելու և թիրախ դառնալու համար:

Որպես այդպիսի մի իրավիճակ, նա հիշեցնում է երեկվա նիստի որոշ մանրամասներ՝ կապված Խաժակյանի ելույթի հետ:

«Խաժակյանը բացահայտել է Երևանի քաղաքապետարանում տեղի ունեցած պաշտոնական կեղծիք, բայց ո՞ւր են դրա մասին լուսաբանումը՝ չկան, փոխարենը լուսաբանվել է քաղաքապետի ծիծաղի և այլն, այլն... ու եթե Խաժակյանը կեղծիք է բացահայտում և մատուցում է այն, և դրա մասին 0 հրապարակում՝ նշանակում է ուրեմն ավելի է լավ է չմասնակցենք»,- ասաց Մարուքյանը:

Նրա դիտարկմամբ՝ բովանդակային քննադատությունը այլևս չի դառնում ուղղություն և լսելի չէ: