Բյուջեում իրողությունից կտրված թվեր ու հաշվարկներ են, կառավարությունը ցանկացել է խաբկանք ստեղծել․ Մանե Թանդիլյան (տեսանյութ)

ՀՀ 2020 թվականի բյուջեում իրողությունից կտրված թվեր ու հաշվարկներ են։ Ազգային ժողովում բյուջեի քննարկման ժամանակ հայտարարեց «Լուսավոր Հայաստան» խմբակցության պատգամավոր Մանե Թանդիլյանը:

Նրա դիտարկմամբ՝ բազմաթիվ կարևոր դրույթներ, որոնք գոնե հայտարարության տեսքով ներկայացվել են, բյուջեում չեն ընդգրկվել։ Որպես այդպիսին, Մանե Թանդելյանը նշեց տուրիզմի հետ կապված ծրագրերը, որոնց մասին բարձրաձայնվում է, բայց բյուջեի մեջ ոչ մի տող չկա դրա մասին։ Նույնն է նաև գյուղատնտեսության ծրագրերի դեպքում։ Նա նաև հիշատակեց վերջերս վարչապետ Նիկոլ Փաշինյանի հայտարարության մասին, ըստ որի՝ հաջորդ տարի մինչև «հոկտեմբերի 10-ը 10 մլն ծառ պետք է տնկվի»: 

«Այս մասին ոչ մի տող չկա նշվախ։ Պարզվում է այդ հայտարարությունը վարչապետի մակարդակով ուղղակի միտված է եղել հովանավորներ գտնել և բարի կամքի դրսևորում էր»,- ասաց Մանե Թանդիլյանը։

Նա նաև նշեց մի քանի կետեր, որոնք, ըստ պատգամավորի, իրատեսական չեն։ Դառնալով ֆինանսների նախարար Ատոմ Ջանջուղազյանին, պատգամավորը նշեց, որ ռեյտինգը չգցելու համար, կառավարության համար նպատակահարմար է եղել խաբկանք ստեղծել, լուռ բերել նախագիծ, որը չի համապատասխանում բյուջետային համակարգի մասին կարևորագույն օրենքին։

Մանե Թանդիլյանի գնահատմամբ՝ քանի որ բյուջեի նախագիծը տարակուսանքի տեղիք է տալիս, ուստի նախագիծը հետ վերադարձվի։

«4 օրվա ընթացքում, շատ հրատապ պետք է հետ վերադարձնեք և բյուջետային համակարգի մասին օրենքի բոլոր խախտումները շտկեք»,-եզրափակեց Մանե Թանդիլյանը։

Մանրամասները՝ տեսանյութում