Ժողովուրդը կորցրել է հավատը` իշխանության հանդեպ. Վիգեն Ստեփանյանը ևս դեմ է «բազմաժանր» նախարարության քայլերին (տեսանյութ)

Այսօր` նոյեմբերի 14-ին, կառավարության դիմաց իր բողոքի ձայնն էր բարձրացրել հայ դերասան, բեմադրիչ, ՀՀ արվեստի վաստակավոր գործիչ Վիգեն Ստեփանյանը:

Նա լրագրողների հետ զրույցում նկատեց, որ չի պատրաստվում երիտասարդ ուսանողների հետ սառը քարին նստել ու պահանջել Արայիկ Հարությունյանի հրաժարականը, դա երիտասարդներինն է,  սակայն որպես հայ մարդ, որպես ՀՀ քաղաքացի չի կարողանում հասկանալ «բազմաժանր նախարարության» (նկատի ունի կրթության, գիտության, մշակույթի և սպորտի նախարարությունը-հեղ.) քայլերը:

«Հարգել մեր լեզուն, մեր եկեղեցին, մեր պատմությունը` նման բաները չեն քննարկվում, դա անհրաժեշտ է»,- ասաց Վիգեն Ստեփանյանը:

Նա չի զարմանում, որ վարչապետ Նիկոլ Փաշինյանը պաշտպանում է Արայիկ Հարությունյանին ու նրա նախաձեռնությունը, քանի որ դա «իր մարդն է»: Այս տրամաբանության մեջ արվեստի վաստակավոր գործիչը նաև նկատում է, որ եթե Արայիկ Հարությունյանը հեռանա, դրանից ոչինչ չի փոխվի, քանի որ ինչպես նախկինում, այսօր էլ իշխանությունները աշխատում են «իմ մարդը» սկզբունքով և իրենց մտերիմներին են պաշտոններում նշանակում:

Դիտարկմանը, թե իշխանությունը հայտարարում է, թե ժողովուրդն է որոշում, Վիգեն Ստեփանյանը պատասխանեց. «Էհ, ինչ ուզեն, կհայտարարեն, դուք էլ կարող եք շատ բաներ հայտարարել, բայց իրականությունն այլ է»,- ասաց Ստեփանյանը` հավելելով, որ ինքը ևս քայլ է արել ու ոգևորվել տեղի ունեցածով, բայց այն, ինչ ասվում էր մինչև հեղափոխությունն ու այն, ինչ կատարվում է այսօր` լրիվ տարբեր բաներ են:

Վիգեն Ստեփանյանի համոզմամբ, այսօր շատերն են հուսախաբ եղել ու, եթե արտահերթ ընտրություններ լինեն, ապա ըստ նրա, իշխող կուսակցությունը հազիվ 25-30 տոկոս ձայ հավաքի:

«Մարդիկ արդեն չեն հավատում»,-ասաց նա:

Անդրադառնալով «Մետրո Հանրապետություն» կայարանում տեղի ունեցած «միջոցառմանը», ապա ըստ Վիգեն Ստեփանյանի, այդ գումարով երկու ներկայացում կարելի էր բեմադրել մանկական թատրոններում: Ինչ վերաբերում է Մելինե Դալուզյանի մասին նկարահանվող ֆիլմի ֆինանսավորմանը, ապա արտիստը նկատում է, որ եթե վարչապետը հայտարարում է, թե այդ աղջիկը կամ տղան, չեմպիոն է, ապա չպետք է մոռանալ նաև, որ նա որակարկվել է, քանի որ դոպինգ է ընդունել` խայտառակելով և' թիմին, և' մարզիչին, և' երկիրը...

Մանրամասները` տեսանյութում