Մանրամասներ «Անելիք բանկ»-ի իրավաբանի և Մկրտիչ Պողոսյանի գույքային վեճից

Քննչական կոմիտեն նոր մանրամասներ է հայտնել նոյեմբերի 24-ին Երեւանի կենտրոնում սպանված՝ «Անելիք բանկի» իրավաբան Հովհաննես Աթանյանի դեպքի վերաբերյալ:

Ըստ ՔԿ տարածած հաղորդագրության՝ սպանությունը կատարելու կասկածանքով ձերբակալվել է «Անելիք բանկի» հաճախորդ Մկրտիչ Պողոսյանը, որը դեպքի եղել է իր «ՎԱԶ-2107» մակնիշի ավտոմեքենայով:

Նախնական տվյալներով՝ 54-ամյա տղամարդը բանկի հետ ունղեցել է գույքային վեճ:

Newspress.am –ի տեղեկություններով՝  Մկրտիչ Պողոսյանն իր սեփական տան գրավադրմամբ` վարկով գումար է վերցրել «Անելիք»-ից: Այնուհետև չի կարողացել ժամանակին մարել գումարը: Օգտվելով հաճախորդի անելանելի վիճակից ու շահարկելով նրա ժամկետանց պարտավորությունները չկատարելու հանգամանքը, իրավաբան Աթանյանն առանց սեփականատիրոջ գիտության և համաձայնության յուրացրել է վերջինիս տունը:

Այս խնդիրը վիճաբանության առիթ է դարձել,  ինչի կապացությամբ Պողոսյանը մի քանի անգամ հանդիպել է բանկի իրավաբանական վարչության պետին:

Վերջին հանդիպումը տեղի է ունեցել դեպքի օրը՝ բանկում, որից ժամեր անց էլ կատարվել է սպանությունը։

Հովհաննես Աթանյանի սպանության կասկածանքով Մկրտիչ Պողոսյանը նոյեմբերի 25-ին ձերբակալվել է եւ հարցաքննվել։ Հանցագործության կատարման գործիք հանդիսացած որսորդական հրացանն առգրավվել է։ Ստացվել եւ օրենքով սահմանված կարգով զննության են ենթարկվել դեպքի վայրում գործող տեսախցիկների տեսագրությունները։

Հիշեցնենք, որ Աթանյանի սպանությունը տեղի է ունեցել Երեւանում՝ նոյեմբերի 24-ի երեկոյան. նախնական տվյալներով՝ Վարդանանց փողոցի թիվ 14 շենքի մոտ նրա թիկունքի ուղղությամբ կրակոց է արձակվել որսորդական հրացանից, որի հետեւանքով ստացած վնասվածքներից Աթանյանը տեղում մահացել է, իսկ առերեւույթ հանցագործություն կատարած անձը հրացանը դրել է տաքսի ավտոմեքենայի բեռնախցիկում, նստել ղեկին եւ հեռացել։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: