Հեղափոխությունից հետո փրփուր է մնում ու պղտոր ջրում անարժանները փորձում են ձուկ բռնել․ Վազգեն Մանուկյան

Երբ տեսնում ես, թե ինչ է կատարվում աշխարհում և ինչ է կատարվում Հայաստանում՝ տեսնում ես, որ ինչ-որ բան չի համընկնում։ Այս մասին լրագրողների հետ զրույցում ասաց Հանրային խորհրդի նախագահ, ԱԺՄ կուսակցության նախագահ Վազգեն Մանուկյանը՝ անդրադառնալով ներքին և արտաքին մարտահրավերներին։

Նրա խոսքով` այս տարածաշրջանում Հայաստանն ունի մեծ հարց՝ Ղարաբաղի հարցը։ 

«Ղարաբաղի հարց ասելով, պետք է հասկանալ ո՛չ միայն Ղարաբաղի, այլև Հայաստանի անվտանգության հարցը։ Ի՞նչ վիճակում է այն այսօր՝ չկան բանակցություններ, որը 20 տարի պահում էր մեր ստատուս քվոն»,- ասաց Մանուկյանը՝ հավելելով, որ հնարավոր է պատերազմ չլինի բայց, երբ ավարտվում են բանակցությունները, սկսվում է պատերազմ։

Այս տրամաբանության մեջ Հայաստանը, ըստ բանախոսի, պետք է լուրջ քայլեր ձեռնարկեր, մինչդեռ պառակտումներ ու լարվածություն է։

«Ես մեր ազգն այսքան բզկտված չէի տեսել․ իրար նկատմամբ թույնով լցված, անարժեք մարդիկ հետապնդում են մեր երկրի ու մեր ազգի համար ավելի մեծ արժեք ունեցող մարդկանց»,- ասաց Մանուկյանը։

Այդպես, ըստ Մանուկյանի, Հոկտեմբերի 27-ի գործն է վերաբացվել անարժան մարդկանց ձեռքով։ Նա իրավիճակը որակեց կատարյալ խայտառակություն։ Մանուկյանի խոսքով՝ իրավիճակը հնարավոր է լավացնել, բայց դրա համար իշխանությունը պետք է կտրուկ փոխի իր վարած քաղաքականությունը, որը մնացել է հեղափոխությունից հետո։

«Հեղափոխությունից հետո փրփուր է մնում․ անարժան մարդիկ փորձում են պղտոր ջրում ձուկ որսալ»,- ասաց բանախոսը՝ հավելելով, որ ներքին իրավիճակը ոչ միայն իշխանությունը պետք է փոխի, այլև հասարակությունն ու հենց մեդիադաշտը։