Երեխաներ խելոք մնացեք, չարություն չանեք, չափերդ չանցնեք․ Վենետիկի հանձնաժողովը բավական կոշտ ու հստակ մեսիջներ հղեց Երևանին

Հայաստանում Սահմանադրական դատարանի շուրջ ստեղծված իրադրության հետ կապված Վենետիկի հանձնաժողովի նախագահ Ջիանի Բուքիքիոն հանդես է եկել հայտարարությամբ, որը կարելի է ասել, բավական կոշտ ու հստակ մեսիջներ է հղում Երևանին։

Այն, որ Վենետիկի հանձնաժողովը, որը եվրոպական կառույցներում ազդեցիկ դիրք է գրավում, իր նախագահի շուրթերով խիստ մտահոգություն է հայտնում ստեղծված իրավիճակով ու զարգացումներով, որոնք կատարվում են Հայաստանում, խոսում է այն մասին, որ Եվրոպան նկատելիորեն կոշտացնում է իր կեցվածքը ինքնահռչակ դեմոկրատական կղզյակ «Նոր Հայաստանի» հանդեպ։ Պարզ է, որ եվրոպական դոմոկրատական արժեքների ու իրավական համակարգի տեսակետից, այն ինչ կատարվում է Հայաստանում, պարզապես անըմբռնելի է, որովհետև նրանց համար օրինակ դատական իշխանությունը առհասարակ պետք է կախվածություն չունենա օրվա քաղաքական իշխանությունից, ուր մնաց, թե քաղաքական իշխանությունը փորձի լուծել դատական իշխանության հարցերը՝ բաց առճակատման գնալով։

Արդեն իսկ օրվա մեջ մամուլում հայտնվել էին հրապարակումներ, որ Վենետիկի հանձնաժողովը հստակ ազդակ էր հղել, որ Հրայր Թովմասյանի շուրջ ստեղծված դրությունը համարում է հետապնդում, և այս առումով, սպասելի էր, որ Բուքիքիոն գրեթե նույնաբովանդակ հայտարարությամբ հանդես կգա, հնարավոր շահարկումներից ու իմաստափոխություններից խուսափելու համար։

Բուքիքիոն չի զլանում դասեր տալ, հիշեցնելով իշխանության թևերի տարանջատվածության, ունեցած իրավազորության շրջանակում գործելու, տարբեր թևերի միջև ակնկալվող համագործակցության ու հարգանքի մասին, ինչը կարելի էր օրինակ Երրորդ աշխարհի երկրների դեպքում ասել, սակայն Հայաստանի համար, որը Կովկասում մի ժամանակ ջահակիր էր դեմոկրատական արժեքների, երբ Վրաստանում ու Ադրբեջանում դեռ հետսովետական առաջին փուլի վայրիվերումներն էին, մի տեսակ նույնիսկ կարող է վիրավորական լինել, սակայն մյուս կողմից էլ ցույց է տալիս սանդղաչափի այն անկումը, որը արձանագրել է Հայաստանը։

Տպավորություն էր, թե մանկապարտեզի դայակն ասում է «Երեխաներ խելոք մնացեք, չարություն չանեք, չափերդ չանցնեք», պարզապես եվրոպացիներին հատուկ բառապաշարով ու դիվանագիտական տերմինաբանությամբ։

Յակոբ Բերգեր