550 հազար ԱՄՆ դոլարով կառավարական դասի մեքենաներ՝ Նիկոլ Փաշինյանի և Աննա Հակոբյանի համար. Antifake.am

Որոշ ժամանակ առաջ AntiFake.am-ին տեղեկություններ էին փոխանցվել, որ Նիկոլ Փաշինյանը ձեռք է բերել 2 «Mercedes-Benz» S դասի (S 600 W 222) ամբողջությամբ զրահապատ մեքենաներ, որոնցից յուրաքանչյուրի արժեքը, աղբյուրի փոխանցմամբ, 350.000 ԱՄՆ դոլար է։

Աղբյուրի փոխանցմամբ՝ մեքենաները ձեռք են բերվել հոկտեմբերի 1-ին տեղի ունեցած ԵԱՏՄ Եվրասիական բարձրագույն տնտեսական խորհրդի նիստին մասնակցող պետությունների ղեկավարներին սպասարկելու «անվան տակ», սակայն ձեռքբերման իրական նպատակը եղել է Նիկոլ Փաշինյանին սպասարկող նախկին մեքենան փոխարինելը և նոր մեքենաներով նրա սպասարկումն ապահովելը։

Հոկտեմբերի 1-ի նիստից հետո արդեն Նիկոլ Փաշինյանը տեղափոխվում է նշված մեքենայով և Փաշինյանի ֆեյսբուքյան էջն ու լրատվականները պարբերաբար ֆիքսում են նոր մեքենան։

Ավելի ուշ տեղեկություններ ստացանք, որ նոր ձեռք բերված ամբողջությամբ զրահապատ մեքենաներից երկրորդն էլ հատկացվել է կառավարության կազմում որևէ կարգավիճակ չունեցող վարչապետի տիկնոջը՝ Աննա Հակոբյանին սպասարկելու համար։

Մեր ունեցած տեղեկությունները ճշտելու համար AntiFake.am-ը հարցում էր ուղարկել ՀՀ վարչապետի աշխատակազմին, որտեղից այն վերահասցեագրել էին ՀՀ ԱԳՆ-ին՝ պատճառաբանելով, որ նշված հարցերին իրավասու է պատասխանել այդ կառույցը։

Հայցել էինք տեղեկություններ տրամադրել նիստին մասնակցած պետությունների ղեկավարներին սպասարկած մեքենաների, դրանց գնման կամ վարձակալման մասին։ Ի պատասխան` ՀՀ ԱԳՆ-ից հայտնել են, որ նիստին մասնակցած պետությունների ղեկավարներին սպասարկել են թվով 6 «Mercedes-Benz» մակնիշի ներկայացուցչական դասի ավտոմեքենաներ, որոնցից 2-ը հանդիսանում են ՀՀ սեփականությունը, 1 ավտոմեքենա վարձակալվել է, 3-ը՝ անվարձահատույց տրամադրվել են ՀՀ քաղաքացի հանդիսացող 3 տարբեր անձանց կողմից։

ԱԳՆ-ն, հղում անելով Տեղեկատվության ազատության և Անձնական տվյալների պաշտպանության մասին ՀՀ օրենքերին, մերժել էր տրամադրել մեքենաների սեփականատերերի անունները։

Այսպիսով՝ չնայած, որ հարցմանը տրվել է խուսափողական պատասխան և մեքենաների մոդելների անվանումները և մի շարք այլ մանրամասներ պատասխանում առկա չեն, այնուամենայնիվ հաստատվում է 2 նոր մեքենաների ձեռքբերման հանգամանքը։ Խուսափողականությունից էլ կարելի է ենթադրել, որ ԵԱՏՄ-ն պատրվակ է եղել, իսկ մեքենաները իրականում ձեռք են բերվել Նիկոլ Փաշինյանին և Աննա Հակոբյանին սպասարկելու համար։

Մենք ևս փորձեցինք հասկանալ մեր աղբյուրի մատնանշած մոդելի ավտոմեքենաների արժեքը և գնահարցում ուղարկեցինք Mercedes-Benz-ի` Ռուսաստանում գործող պաշտոնական ներկայացուցչին։ Մեզ ուղարկված պատասխանից պարզ դարձավ, որ S 600 W 222 կամ այլ կերպ S 600 GUARD FL մոդելի մեքենայի արժեքը 42,401,065.50 ռուբլի է, իսկ առաջարկվող հատուկ գինը՝ 36,500,000 ռուբլի, այսինքն՝ ավելի քան 550,000 ԱՄՆ դոլար։

Մանրամասները՝ սկզբնաղբյուր կայքում