Սուսուփուս հեռանում են իշխող թիմից

Հայտնի դարձավ, որ գործող վարչապետ Նիկոլ Փաշինյանի թիմից հեռանում է նաև Կենտրոն վարչական շրջանի թաղապետ Վիկտոր Մնացականյանը։ Օրեր առաջ հեռացել էր նաև Կադաստրի պետական կոմիտեի ղեկավար Սարհատ Պետրոսյանը։

Որքան էլ տարված լինի հասարակությունը ներքաղաքական այլ սուր թեմաներով, միևնույնն է, այս հեռացումները հնարավոր չէ աչքից բաց թողնել։ Իրականում կրկին գլուխ է բարձրացնում կարևոր մի հարց․ ինչու՞ են փաշինյանական թիմի այս ներկայացուցիչները այսպես հուշիկ քայլերով ու աննկատ, կամ էլ չափազանց նրբանկատ ու բարեկիրթ «հրաժեշտի գազելներով» թողնում թիմը։ Կամ ովքե՞ր պետք է նրանց փոխարինեն մի թիմում, որտեղ առանց այն էլ բանիմաց կադրերի սով է ուղղակի, իսկ կադրերի դեֆիցիտն այլևս նույնիսկ չի էլ թաքցվում։

Այս համատեքստում ակամա կարելի է հիշել հայտնի դասական գրոսմայստերի խոսքերը, թե Նիկոլ Փաշինյանը չունի թիմ ու կկորցնի ամեն ինչ, եղածներն էլ հենց նրան կործանողները կլինեն։ Այս ամենը, իհարկե կանխատեսելի էր։ Չէ որ խեցգետնի ու գայլաձկան սկզբունքով միատեղված թիմը մեծ հաշվով միայն կապված է շահերի կարճաժամկետ համընկնմամբ ու չունի գաղափարական հենք, իսկ նման դեպքերում արդեն պարզ է, որ թեթև քամիները նույնիսկ կարող են զուտ ինքնապահպանման բնազդի գործելու ուժով, մարդկանց դրդել լքել նավը, քանի դեռ նավաբեկությունը չի սկսվել։

Սա հասկանում է անշուշտ նաև Փաշինյանը։ Ի վերջո նա հասկանում է, որ հինգ տարվա մանդատը հավերժական չի կարող ձգվել ու գալու են նոր ընտրությունները, իսկ քաղաքական ուժդ պետք է այդ ժամանակամիջոցում այնպես ամրացնես, որ գոնե հաջորդ խորհրդարանում եթե ոչ մեծամասնություն կազմելու, այլ գոնե հայտնվելու հույս ունենաս։ Ուստի պատահական չէ այն, որ սկսել են ամեն դեպքում «Քաղպայմանագրի» գաղափարախոսության ձևավորման աշխատանքներ տարվել, քանի որ հասկացել են, որ անհնար է շարունակել «խեցգետնի ու գայլաձկան» սկզբունքով։

Յակոբ Բերգեր