Ինչու նկարահանող սարք պահելու համար ընտրվեց խիստ պատժամիջոց, իսկ «Հայելի»-ի դեպքում` մեղմ. Ա.Վարդևանյան (տեսանյութ)

ՀՀ երկրորդ նախագահ Ռոբերտ Քոչարյանի աջակիցներ Նարեկ Մութաֆյանի և Սարգիս Օհանջանյանի գործում առկա է երկակի մոտեցում: Այս մասին ՀՀ վերաքննիչ քրեական դատարանի դիմաց, լրագրողների հետ զրույցում ասաց սահմանադրագետ Արամ Վարդևանյանը:

Նրա դիտրակմամբ՝ ընտրվել է արարքի որակման ամենահնարավոր ամենախիստ տարբերակը, քանի որ վերջիններս ընդամենը տեսանկարահանել են: Արամ Վարդևանյանը համեմատեց միջադեպը «Հայելի» մամուլի ակումբի նկատմամբ տեղի ունեցած խուլիգանական դեպքի հետ, որտեղ որպես պատժամիջոց ընտրվեց ամենամեղմ տարբերակը, սակայն նկատեց, որ նույնը չենք կարող ասել այս դեպքում, երբ ընտրվել է հնարավորինս ամենածանր տարբերակը:

«Այսինքն` տվյալ դեպքում պարզապես տեսանկարահանող սարք պահելով կարող ես դատական գործընթացին կամ արդարադատությանը միջամտել: Կարծում եմ` դա նույնիսկ տեսականորեն հնարավոր չէ»,- ասաց նա:

Դրանից բացի, նա մատնանշեց այլ մտահոգող փաստեր ևս:

Հիշեցնենք, որ Նարեկ Մութաֆյանը կալանավորվել է սեպտեմբերի 29-ին Երևանի ընդհանուր իրավասության դատարանի դատավոր Արտուշ Գաբրիելյանի որոշմամբ։ Դրանից 2 օր առաջ, սեպտեմբերի 27-ի ուշ երեկոյան դատավոր Աննա Դանիբեկյանն, ով քննում է Ռոբերտ Քոչարյանի եւ մյուսների վերաբերյալ քրեական գործը, ոտքով գնալիս է եղել Շենգավիթի դատարան, երբ նրան են մոտեցել երիտասարդներ, որոնց թվում՝ Նարեկ Մութաֆյանը: Վերջինս մասնակցում էր Շենգավիթի դատարանի դիմաց ի պաշտպանության Ռոբերտ Քոչարյանի բողոքի ակցիաներին: Մութաֆյանը, ֆեյսբուքում ուղիղ եթերով հեռարձակում միացնելով, դատավոր Դանիբեկյանին հարցրել է, թե արդյոք նա կա՞ «վնգստացող դատավորների ցանկում»: